Nigar Arpadarai: Azərbaycan COP29 çərçivəsində ədalətli mövqeyini nümayiş etdirib
Bakı, 28 aprel, AZƏRTAC
Qlobal iştirak təmin edilmədən qlobal gündəlik öz mahiyyətini itirir. Bəs universallığa nail ola bilmişikmi? Qlobal gündəlik ətrafında birləşmişikmi? Bəli, biz bilirik ki, mürəkkəb və çətin bir keçid dövründən keçirik. COP kimi təşəbbüslər bu şəraitdə son dərəcə vacibdir. Ortaq və praktiki mexanizmlər yaradılmalı, konkret icra mexanizmləri ilə təmin edilməlidir.
AZƏRTAC xəbər verir ki, bu fikirləri COP29-un İqlim Dəyişmələri üzrə Yüksəksəviyyəli Çempionu Nigar Arpadarai aprelin 28-də Bakıda keçirilən “Həmrəy fəaliyyət: yeni və ədalətli dünya üçün Qlobal Cənub QHT-lərinin gücləndirilməsi” adlı forumda çıxışı zamanı səsləndirib.
Azərbaycanın COP29 çərçivəsində ədalətli mövqeyini nümayiş etdirdiyini xatırladan Nigar Arpadarai əlavə edib: “Çoxsaylı maraqlı tərəfləri birləşdirmək vacibdir. Heç bir saziş, nə qədər iddialı olsa da, əgər inam və insanların dəstəyi olmadan davamlı ola bilməz. Biz əldə etdiyimiz nəticələrdən dərs çıxarmalıyıq. Azərbaycan hər zaman həmrəyliyin tərəfində olub. Biz Qlobal Cənubun səsini ucaltmağa və Qlobal Şimalla dialoqa çalışmışıq”.
Onun sözlərinə görə, yerli tədbirlər qlobal dəyişikliklərə təsir edir. İqlim tədbirləri lokal səviyyədə həyata keçirilməlidir, lakin qlobal dəstək ilə möhkəmləndirilməlidir.
Bölmənin digər xəbərləri
