Norveçdə yaşayan azərbaycanlı alimin yeni lüğəti işıq üzü görüb
Bakı, 10 iyul, AZƏRTAC
Norveçdə yaşayan azərbaycanlı alim İrəc İsmayılın müəllifi olduğu “Azərbaycanca-norveçcə sözlük” çap olunub.
Bunu AZƏRTAC-a açıqlamasında yazıçı Vaqif Sultanlı deyib.
O diqqətə çatdırıb ki, Azərbaycan və Norveç dilləri arasında lüğətçilik sahəsində ilk dəfə hazırlanan bu nəşr iki xalqın dil və mədəni əlaqələrinin inkişafı baxımından mühüm hadisədir.
“Sözlükdə 25 mindən artıq söz və söz törəməsinin norveçcə qarşılığı verilir. Nəşr Azərbaycan dilinin leksik imkanlarını norveçdilli oxucuya tanıtmaqla yanaşı, Norveçdə yaşayan azərbaycanlıların gündəlik ünsiyyət, təhsil, tərcümə və dil öyrənmə ehtiyaclarına da cavab verir. “Azərbaycanca-norveçcə sözlük” xüsusilə Norveçdəki soydaşlarımızın ana dilinin qorunması və yeni nəslə ötürülməsi baxımından dəyərli mənbədir. Sözlük, eyni zamanda, Azərbaycan dili və mədəniyyətinə maraq göstərən norveçlilər, tərcüməçilər, müəllimlər, tələbələr və araşdırıcılar üçün də faydalı vəsait olacaq.
İrəc İsmayılın uzunmüddətli zəhmətinin nəticəsi olan bu sözlüyün nəşri Azərbaycan dilinin beynəlxalq müstəvidə tanıdılması, müxtəlif dillər arasında qarşılıqlı anlaşmanın gücləndirilməsi və Azərbaycan–Norveç ədəbi-mədəni əlaqələrinin genişlənməsi istiqamətində mühüm addımdır”, -deyə V.Sultanlı əlavə edib.
Bölmənin digər xəbərləri
