Novosibirsk sakinləri Rusiya ilə Azərbaycanın münasibətlərini necə təsəvvür etmələri barədə söhbət açıblar
Moskva, 25 avqust, AZƏRTAC
Rusiyanın “Pravda.ru” nəşrində bildirilir ki, Novosibirsk sakinləri Rusiya-Azərbaycan Dostluq Mərkəzinin (RAD) nümayəndələri ilə söhbətdə Rusiya - Azərbaycan münasibətlərini necə təsəvvür etmələri barədə fikirlərini bölüşüblər.
Rusiya Federasiyasında avqustun 3-də qeyd edilən Dövlət Bayrağı Günündə RAD mərkəzinin nümayəndələri Rusiyanın Novosibirsk şəhərinin sakinləri arasında sorğu aparıblar. Həmin gün Novosibirskdə çoxsaylı tədbirlər keçirilib. Şəhərin yüzlərlə sakini bayram münasibətilə təşkil olunan təntənəli nümayişlərdə, velosiped və motosiklet yürüşlərində iştirak edib. Vilayətin qubernatoru, şəhər meri və ictimai təşkilatların nümayəndələri Novosibirsk şəhərinin mərkəzi parkında toplaşan yerli sakinləri bayram münasibətilə təbrik ediblər.
“Pravda.ru” nəşri RAD mərkəzinin direktoru Nataliya Krasovskayanın bu sözlərini sitat gətirir: “Vətənpərvərlik, öz dövlətinə görə qürur duyğusu, dövlət rəmzlərinə hörmət hissi ölkəmizin daha sıx birləşməsinə kömək edir, bu cür birlik isə indiki xarici təhdidlər qarşısında bizim üçün zəruridir. Lakin bədxahlarımıza qarşı çıxmaq vacib olduğu kimi, dostlarla mehriban münasibətləri qoruyub saxlamaq da zəruridir. Mən Novosibirskdə demişəm, Azərbaycan Rusiyanın ən köhnə dostlarından biridir. Beynəlxalq aləmdə öz mövqeyini bildirmək hüququnu qoruyan, ikili standartlar siyasətinə etiraz edən ölkələrə qarşı həyasızcasına aparılan informasiya müharibəsinə baxmayaraq, Azərbaycan Rusiyanı dəstəkləyir. Belə cəhdlərə cavab olaraq, Rusiya və Azərbaycan xalqları həmişə olduğu kimi, bu gün də öz müstəqilliyini və gücünü, xalqlarımızın mehriban qonşuluq münasibətlərini və tarixi yaxınlığını qoruyub saxlaya bilərlər”.
RAD mərkəzinin əməkdaşları tərəfindən Novosibirskdə keçirilmiş rəy sorğusu bir daha göstərib ki, Rusiya sakinləri həqiqətən Azərbaycanı özlərinin köhnə dostu və yaxın qonşusu hesab edirlər. Respondentlərin Azərbaycanı necə qəbul etdikləri, Azərbaycan haqqında nə bildikləri, iki ölkə arasında münasibətlərin inkişafını necə təsəvvür etdikləri barədə suallara bəzi cavablarını təqdim edirik:
-Rusiya ilə Azərbaycan arasında münasibətlər dostluq məcrasında inkişaf etməlidir, çünki bu iki ölkə əsrlər boyu bir-birinin yanında, birlikdə olub. Axı biz həmişə dostluq etmişik. Məsələn, mənim bacım azərbaycanlıya ərə gedib. O həmişə Azərbaycanın necə mehriban, qonaqpərvər, gözəl ölkə olması barədə danışır. Mən hələ orada olmamışam, amma hökmən oraya getmək istəyirəm.
-Bu yaxınlarda Bakıda Avropa Oyunları keçirildi, mən həmin oyunları sona qədər izlədim, amma təəssüf ki, canlı-canlı yox, televiziya ilə tamaşa etdim. İndi isə çox istərdim ki, Azərbaycanı görüm, çünki həmin günləri unutmaq olmaz, hər şey çox gözəl idi. İstərdim ki, belə tədbirlər çox keçirilsin. Onda rusiyalıların daha çox hissəsi Azərbaycan haqqında biliklərə malik olacaq və bu, mənim fikrimcə, bizim münasibətlərimizin xeyrinə olacaq. Düzdür, münasibətlərimiz indi də yaxşıdır, lakin daha yaxşı olacaq!
-Biz uzun müddət bir ölkədə yaşamışıq. Çox sıx münasibətlərimiz olub. Azərbaycandan olan dostlarım var. Bu dostluq uzun illərdir ki, davam edir. Bizim keçmişimiz ortaq olub və yaxşı olardı ki, biz əvvəlki kimi yenə birgə olaq.
-Bilirsinizmi, hesab edirəm ki, başqa xalqların mədəniyyəti ilə tanış olmağın ən yaxşı üsulu turist səfərləridir. Bu yaxınlarda mənim rəfiqəm Bakıda olub, bu şəhər onun çox xoşuna gəlib, Bakı barədə elə həvəslə danışırdı ki! Ailəmiz artıq qərara alıb ki, gələn il biz də Bakıya gedək, Azərbaycanın tarixi və mədəniyyəti ilə tanış olaq.
-Tarixən iş elə gətirib ki, Rusiyada yaşayan etnik azərbaycanlılar və Azərbaycanda yaşayan ruslar çoxdur. Biz bir-birimizə hörmətlə yanaşmalı, xalqlarımızın mədəniyyətini öyrənməli və başa düşməliyik, onda bu qonşuluq hər iki tərəf üçün faydalı olar. Hesab edirəm ki, indi biz bir-birimizin qədrini bilirik, bir-birimizdə yaxşı cəhətlər tapırıq. Mən belə hesab edirəm: ölkələrimizin bir-biri ilə dostluq edən sakinləri nə qədər çox olsa, dövlətlərimiz arasında münasibətlər bir o qədər yaxşı olacaq.
Rusiya-Azərbaycan Parlamentlərarası Dostluq Qrupunun rəhbəri Dmitri Savelyev qeyd edib ki, Dövlət Bayrağı Gününün mahiyyəti cəmiyyətin bütün qüvvələrini birləşdirməkdir. O deyib: “Vətənpərvər o şəxsdir ki, övladlarını böyüdür, işə gedir, vicdanlıdır, səmimi olmağı bacarır, yaşadığı ölkəni sevir, öz vətənini sevir. Vətənpərvər - sadəcə yaxşı insandır. Rusiya ilə Azərbaycanı bir-birinə bağlayan minlərlə bu cür insanlar var. Xalqlarımızı bir-birinə bağlayan dostluq telləri dövlətlərimizin iqtisadi və ya siyasi maraqlarından daha güclüdür. Prezidentlər Vladimir Putindən və İlham Əliyevdən başlayaraq iki ölkənin vətəndaşları arasında onilliklər boyu mehriban münasibətlər formalaşıb. Yaxşı dostları qiymətləndirmək və onlara hörmət etmək - bu da vətənpərvərlikdir. Bu, ölkənin gələcəyinin yaxşı təməlidir”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
