Nüfuzlu “Pakistan Observer” qəzetində Xocalı soyqırımına həsr olunmuş geniş məqalə dərc edilmişdir
Bakı, 22 fevral (AZƏRTAC). Pakistanın nüfuzlu “Pakistan Observer” qəzetinin 22 fevral tarixli nömrəsində tanınmış jurnalist Liaqat Turun Xocalı soyqırımına həsr olunmuş geniş məqaləsi dərc edilmişdir.
Azərbaycanın Pakistandakı səfirliyindən AZƏRTAC-a bildirmişlər ki, məqalədə Qarabağın tarixi, ermənilərin Azərbaycana köçürülməsi və torpaqlarımızda Ermənistan dövlətinin yaradılması haqqında ətraflı məlumat verilmişdir. Yazıda XX əsrin axırlarından başlayaraq ermənilərin Azərbaycana qarşı əsassız torpaq iddialarından və apardıqları etnik təmizləmə siyasəti nəticəsində iki yüz mindən çox azərbaycanlının Ermənistandan qovulmasından söhbət açılmışdır.
Məqalədə XX əsrin sonlarında öz havadarlarından dəstək alan ermənilərin Azərbaycana qarşı ərazi iddiaları qaldırdıqları bildirilmişdir. Vurğulanmışdır ki, Ermənistanın təcavüzü nəticəsində Azərbaycanın Dağlıq Qarabağ bölgəsi və ona bitişik daha 7 rayonu zəbt edilmiş, işğal nəticəsində bir milyondan çox insan ata-baba yurdlarından didərgin düşmüş, 20 min insan qətlə yetirilmişdir.
Liaqat Tur işğalın daha da geniş miqyas almasının qarşısının Azərbaycan xalqının ümummilli lideri Heydər Əliyevin rəhbərliyi altında alındığını və 1994-cü ildə atəşkəs sazişinin imzalandığını bildirmişdir.
Məqalədə 1992-ci il fevralın 26-da Azərbaycanın Xocalı şəhərində törədilmiş qırğının münaqişənin ən qanlı və faciəli səhifəsi olduğu qeyd edilmişdir. Bildirilmişdir ki, Xocalı şəhəri uzun müddət mühasirədə saxlanılmış və orada yalnız mülki əhali qalmışdı.
Jurnalist Ermənistan silahlı qüvvələrinin keçmiş SSRİ-nin Xankəndi şəhərində yerləşən 366-cı motoatıcı alayının hərbi texnikası və şəxsi heyətinin iştirakı ilə Xocalıda mülkü əhaliyə qarşı törətdiyi soyqırımının təfərrüatları, habelə uşaqlara, qadınlara, ahıllara qarşı edilmiş vəhşiliklər barədə məlumatlar vermişdir. O, bu qırğının ermənilərin məqsədyönlü şəkildə etdiklərini ön plana çəkmiş və soyqırımının fəal iştirakçısı olmuş Ermənistanın hazırkı prezidenti Serj Sarksiyanın “Biz ermənilərin mülki əhalini məhv etməyə qadir olmadığı haqqında stereotipi qırdıq” sözlərini buna sübut kimi diqqətə çatdırmışdır. Məqalədə Xocalı soyqırımının xarici mətbuatda geniş işıqlandırıldığı bildirilərək Qərb mətbuatında nəşr edilmiş çoxsaylı məqalələrdən sitatlar gətirilmişdir.
Liaqat Tur yazısında Xocalı qırğınının ermənilərin azərbaycanlılara qarşı törətdikləri birinci soyqırımı olmadığını qeyd etmiş, 1918-ci ildə erməni silahlı dəstələrinin Bakıda, Şamaxıda, Qubada və digər şəhərlərdə on minlərlə günahsız insanı qətlə yetirdiyini vurğulamışdır. Özlərini məzlum və təqiblərə məruz qalmış xalq kimi qələmə verən və insan hüquqlarından dəm vuran ermənilərin orta əsrlərə məxsus vandallıqla mütəmadi olaraq dinc azərbaycanlılara qarşı qətliam törətdikləri qeyd edilmişdir.
Müəllif Ermənistan-Azərbaycan, Dağlıq Qarabağ münaqişəsinin həlinin və Xocalı soyqırımının tanınmasının hüquqi məqamlarını da açıqlamışdır. Yazıda BMT Təhlükəsizlik Şurasının, Baş Məclisinin qətnamələri, İslam Əməkdaşlıq Təşkilatının, Qoşulmama Hərəkatının qərarları qeyd olunmuş, işğalçı Ermənistanın bu mötəbər beynəlxalq qurumlar tərəfindən qəbul edilmiş sənədlərə məhəl qoymadığı xüsusi vurğulanmışdır. Eyni zamanda, Lissabon sammitinin Dağlıq Qarabağ münaqişəsinin həllinə dair əsas prinsipləri də açıqlanmışdır. Bununla yanaşı, müəllif Xocalı soyqırımının Pakistan, Meksika, Kolumbiya, Rumıniya, Çexiya, ABŞ-ın bir neçə ştatı tərəfindən rəsmən tanındığını, bir çox dövlətlərin parlamentlərində müzakirə mövzusu olduğunu diqqətə çatdırılmışdır.
Liaqat Tur bir neçə hüquqi aktı əsas gətirərək bunların Xocalı soyqırımını beynəlxalq cinayət adlandırmağa tam əsas verdiyini vurğulamışdır.
Xocalı soyqırımının dəhşətlərini əks etdirən fotoların da yer aldığı məqalənin tam mətnini aşağıdakı link vasitəsilə oxumaq mümkündür: http://epaper.pakobserver.net/201302/22/misc.php
Bölmənin digər xəbərləri
