“Ödəniş itlər üçün 60, pişiklər üçün 70 manatdır...” - Ev heyvanlarının gözəllik salonu
Bakı, 29 oktyabr, Nailə Həsənova, İlkin Cavanşirov, AZƏRTAC
Paytaxt Bakıda evlərində bir sıra heyvanlar, xüsusilə, it və pişik saxlayanlara çox rast gəlinir. Şübhəsiz ki, bu heyvanlara mütəmadi olaraq qulluq göstərilməsinə, o cümlədən onların təmiz saxlanmasına, eləcə də estetik baxımdan səliqəyə salınmasına ehtiyac yaranır. Təsadüfi deyil ki, hazırda Bakıda ev heyvanları üçün xüsusi gözəllik salonları fəaliyyət göstərir. Əsasən it və pişiklərə gigiyenik, estetik qulluq göstərilən bu salonların əməkdaşları onların yuyulmasını, tüklərinin və dırnaqlarının kəsilməsini, qulaqlarının və gözlərinin, bəzən isə dişlərinin təmizlənməsini həyata keçirirlər.
Ev heyvanlarında xəstəliklər ola bilər
AZƏRTAC-ın əməkdaşları Bakıda fəaliyyət göstərən həmin salonlardan birində göstərilən xidmətlərlə tanış olublar. Paytaxtın Nərimanov rayonunda yerləşən “Woof-woof grooming and spa” salonunun sahibi Flora Rəhimzadənin dediyinə görə, onda heyvanlar üçün salon yaratmaq ideyası xarici ölkələrdən birinə səfəri zamanı yaranıb. O, həmçinin bildirib ki, hazırda 1 iti və 3 pişiyi var. O, pişiklərdən 2-ni küçədən evə gətirib, 1-ni isə həyat yoldaşı tapıb. İti də ona bağışlayıblar. Heyvan sahibi olandan sonra onları müntəzəm şəkildə şəhərdəki heyvanlar üçün nəzərdə tutulan salonlara aparıb. Bir müddət sonra isə özünün və başqalarının heyvanlarına qulluq təşkil etmək məqsədilə ideyasını reallaşdırmaq qərarına gəlib.
Flora Rəhimzadənin sözlərinə görə, sahibi olduğu salonda sanitar-gigiyenik qaydalara xüsusi diqqət yetirilir: “Heyvanlarda səpkilər, iltihabı və yoluxucu xəstəliklər ola bilər və bu, çox təhlükəlidir. Ona görə də hər dəfə heyvanlara qulluq edildikdən sonra bütün avadanlıqlar dezinfeksiya olunur. Təmizlik işlərinin gigiyenik qaydalar əsasında aparılması ciddi nəzarət altındadır”.
Göstərilən xidmətlərin qiymətləri barədə danışan salon sahibi deyib: “Göstərdiyimiz xidmətlər yüksək səviyyədədir və hər şey nəzərə alınır. Ona görə də ola bilsin ki, digər salonlara baxanda xidmət haqqı bir az yüksəkdir. Salonda eyni vaxtda qulluq üçün çoxlu heyvan qəbul edilmir, onların arasında ən azı 1-2 saat fasilə verilir. Həmin müddətdə salondakı alətlər sterilizasiya olunur. Çalışırıq ki, heç bir heyvan zərər çəkməsin. Heyvan xəstələnəndə onun sahibi də əziyyət çəkir. Yeri gəlmişkən, qeyd edim ki, itlər üçün gigiyena 40, kompleks qulluq 60, pişiklər üçün gigiyena 40, kompleks qulluq 70 manatdır”.
Pişiklər təmizkardır, itlər isə fərqlidir
Salonda heyvanlara qulluq edən (groomer) Röya Təhməzova 8 ildir bu sahədə çalışdığını söyləyib. O deyib ki, son 6 ayda “Woof-woof grooming and spa” salonunda fəaliyyət göstərib. Əsasən itlərə qulluq edən həmsöhbətimiz evində 6 it saxladığını deyib: “Qoca itim var idi, onun tüklərini kəsmək lazım gəlirdi. Bu işi öyrənmək üçün salonda usta köməkçisi kimi işə başladım. Getdikcə saç düzümlərini, digər qulluq qaydalarını öyrəndim, peşənin incəliklərinə yiyələndim. Doğrudur, son illər səhhətimlə əlaqədar olaraq böyük pişikləri qəbul etmirəm. Ancaq pişik balalarına qulluq edirəm”.
İtlərin qulluğa daha çox ehtiyaclarının olduğunu deyən Röya Təhməzova bunu pişiklərin xarakteri ilə əlaqələndirib: “Pişiklər təmizliyi sevirlər. Onlar özlərini yalayaraq müəyyən təmizlik işi aparırlar. İtlər isə fərqlidir. Bakıda daha çox uzun tüklü itlərə üstünlük verilir, hətta onlara oyuncaq kimi baxırlar. İtlərin tüklərini bir həftə daramayanda dolaşır. Bu zaman itlərin dərisi qırışır və onların tüklərini darayanda ağrı verir. Axı, it də canlıdır, onu incitmək olmaz. Ona görə bunu mütləq nəzərə almaq lazımdır”.
Ən çox qulluq tələb edən itlərdən danışan Röya Təhməzova deyib ki, Şpits, Pudel, Maltsipoo kimi cinslər dəbdə olduğundan onları salona daha çox gətirirlər: “Onların tükləri gündə 1 dəfə daranmalı, 15 gündən bir qulluğa aparılmalıdır. Həmin növ itlərin tükləri tez uzandığına görə vaxtaşırı gigiyena tələb olunur. Saçlarının çox uzanmaması üçün ayda bir dəfə tükləri qısaldılmalıdır”.
Heyvanlara fərdi yanaşılmalıdır
Röya Təhməzova hər bir heyvana fərdi yanaşmağın lazım gəldiyini söyləyib: “İtlər aqressivləşəndə, psixoloji problemləri olanda onları qəbul etmirik. Ola bilsin ki, nə vaxtsa qulluğa gələn itin xoşuna gəlməyən məqamlar olub, bu zaman onun aldığı psixoloji travma qalır. Belə olanda itin psixoloji cəhətdən sakitləşməsini gözləmək lazımdır. Bildirim ki, hər il ustalar üçün ustad dərsləri təşkil edilir. Bundan başqa, xarici ölkələrdə təşkil edilən psixoloji kurslara gedirik və belə məqamlarda heyvanla “dil tapmağın” yollarını daha mükəmməl öyrənirik”.
O, ev heyvanlarına qulluq zamanı bütün prosedurların şəffaf şüşə arxasında və sahiblərinin qarşısında, müşahidə kameraları altında aparıldığını bildirib. İt və pişiklərə qulluğun fərqindən bəhs edən həmsöhbətimizin sözlərinə görə, pişiklər üçün ideal sakitlik olmalıdır: “Onlar fenin ən zəif səsini də sevmirlər. Həm də psixoloji olaraq özlərini təhlükəsiz hiss etməlidirlər, əks halda aqressivləşirlər. Pişiklərin tüklərini qırxmaq olmaz, onların tükləri daranmalıdır. Bəzən bunu anlamayanlar olur. İtlərə qulluğa onların çimizdirilməsi, dırnaqlarının kəsilməsi, qulaqlarının təmizlənməsi daxildir. Dırnaq kəsimi mütləqdir. Heyvanın dırnaqları uzandıqca pəncəyə daxil olaraq onu yaralaya bilər”.
Qeyd edək ki, mütəxəssislərin bildirdiklərinə görə, bəzi zoonoz xəstəliklər var ki, bunlar insanlardan heyvanlara və heyvanlardan insanlara keçə bilər. Ona görə də evlərində heyvan saxlayanlar onlara xüsusi diqqət yetirməli, gigiyena qaydalarına ciddi əməl etməlidirlər.
Bölmənin digər xəbərləri
