İQTİSADİYYAT
Ölkənin istilik təchizatı infrastrukturunun vəziyyəti ilə bağlı müzakirələr aparılıb
Bakı, 21 oktyabr, AZƏRTAC
Energetika Nazirliyində “Azərbaycan Respublikasında kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsi”nin “Dayanıqlı və etibarlı istilik təchizatı infrastrukturunun yaradılması” strateji hədəfi üzrə tədbirlərin icra vəziyyətinə dair iclas keçirilib.
Nazirlikdən AZƏRTAC-a bildirilib ki, iclasda coğrafi, sosial və iqtisadi xüsusiyyətlər nəzərə alınmaqla ölkədə optimal istilik enerjisi təchizatı sisteminin genişləndirilməsi və təkmilləşdirilməsi məqsədilə görülmüş işlərə dair hesabat təqdim edilib. Aparılmış təhlil və araşdırmalar əsasında hazırlanmış hesabatda istilik təchizatı sisteminin mövcud vəziyyəti, əsas texniki, iqtisadi və maliyyə göstəriciləri, alternativ və bərpaolunan enerji mənbələrinin istilik məqsədləri üçün istifadə imkanları, rayonların istilik təchizatı sistemində itkilər və bu itkilərin azaldılması üçün tövsiyələr əksini tapıb.
Bildirilib ki, tövsiyələr Bakı şəhəri və respublikanın regionlarında mərkəzləşdirilmiş istilik təchizatı sistemlərinin bərpası, yaşayış binalarında və sosial obyektlərdə aşağı paylama və məhəllədaxili istilik sistemlərinin yenidən qurulması, mövcud qazanxanaların modernləşdirilməsi, yeni istilik mənbəyinin yaradılması üçün atılacaq addımları müəyyənləşdirir. İsitmə məqsədilə alternativ və bərpaolunan enerjidən istifadə imkanlarının qiymətləndirilməsi müsbət qiymətləndirilib.
Qeyd olunub ki, istilik və isti su təchizatı xidmətlərinin göstərilməsi ilə bağlı istilik enerjisinin istehsalı, ötürülməsi, paylanması və satışı qaydalarının müəyyən edilməsi, istilik təchizatı müəssisəsi ilə istehlakçı arasında qarşılıqlı münasibətlərin tənzimlənməsi məqsədi ilə “İstilik enerjisindən istifadə Qaydaları” hazırlanıb və aidiyyəti qurumlarla razılaşdırılmaqdadır.
İclasda İqtisadiyyat Nazirliyi, İqtisadi İslahatların Təhlili və Kommunikasiya Mərkəzi, “Azəristiliktəchizat” ASC, Enerji Məsələlərini Tənzimləmə Agentliyi, Alternativ və Bərpaolunan Enerji Mənbələri üzrə Dövlət Agentliyinin nümayəndələri iştirak ediblər.