Omanda İran-ABŞ danışıqlarının növbəti raundu keçirilib
Qahirə, 12 may, AZƏRTAC
Bu raundda biz ümumi məsələlərdən xeyli uzaqlaşıb, detalları müzakirə mərhələsinə keçdik. Bu baxımdan demək olar ki, danışıqlar irəliləyir.
AZƏRTAC İRNA agentliyinə istinadla xəbər verir ki, bunu İranın xarici işlər naziri Seyid Abbas Əraqçi Omanın vasitəçiliyi ilə Məsqətdə baş tutan İran və ABŞ arasında Tehranın nüvə proqramı ilə bağlı dolayı danışıqlar raundunun nəticələri barədə açıqlamasında deyib.
“Təbii ki, vəziyyət daha çətin olacaq, lakin çətinliklərə və danışıqlarda hökm sürən açıqlığa baxmayaraq, bu raundda son dərəcə faydalı müzakirələr aparıldı. İndi artıq tərəflərin mövqelərinin daha yaxşı başa düşüldüyünü deyə bilərik”, - deyə XİN rəhbəri vurğulayıb.
Nazir diqqətə çatdırıb ki, bu raundda mübahisəli məsələlər müzakirə edilib və onlar daha dərindən araşdırılıb. Tərəflərin mövqeləri bir-birinə daha da yaxınlaşıb.
İran xarici işlər naziri qeyd edib ki, tərəflər növbəti raundun keçirilməsi barədə razılığa gəlib. Görüşün vaxtı və yeri tərəflərin proqramlarına əsasən müəyyən ediləcək.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
