“ONKOLOJİ YARDIM HAQQINDA” QANUN LAYİHƏSİ ÜÇÜNCÜ OXUNUŞA HAZIRDIR

16.05.2006 [19:16]
Çap et
A⁺ A^-

AZƏRTAC xəbər verir ki, Milli Məclisin sosial siyasət daimi komissiyasının mayın 16-da keçirilmiş iclasında “Onkoloji yardım haqqında” qanun layihəsi müzakirə olunmuşdur. Komissiyanın sədri Hadi Rəcəbli demişdir ki, parlamentdə layihənin ikinci oxunuşda müzakirəsi zamanı səslənmiş irad və təkliflərin əksəriyyəti nəzərə alınmış və sənəd əsaslı surətdə təkmilləşdirilmişdir. Qanun layihəsi üçüncü oxunuşun tələblərinə, eləcə də beynəlxalq standartlara cavab verir və onun əhatə dairəsi çox genişdir.

Bildirilmişdir ki, bədxassəli şişlərdən əziyyət çəkən şəxslərə ixtisaslaşdırılmış tibbi və sosial yardım göstərilməsinin hüquqi əsaslarını müəyyən edəcək bu qanun Azərbaycan vətəndaşlarına, əcnəbilərə, eləcə də respublika ərazisində daimi yaşayan vətəndaşlığı olmayan şəxslərə, habelə, təşkilat-hüquqi formasından asılı olmayaraq, onkoloji xəstəliklərin profilaktikası və müalicəsi ilə məşğul olan bütün fiziki və hüquqi şəxslərə şamil ediləcəkdir. Qanun layihəsində bədxassəli şişlərdən əziyyət çəkən şəxslərə dövlət təminatlı yardımın göstərilməsi, onların dispanserizasiyası, müayinə, müalicə və reabilitasiyası, onkoloji xidmət strukturlarının yaradılması və onların maddi-texniki bazasının gücləndirilməsi, onkoloji xəstəliklərin azaldılmasına yönəldilmiş profilaktik tədbirlərin həyata keçirilməsi və s. müddəalar əksini tamışdır.

Qanun layihəsinin Milli Məclisin müzakirəsinə çıxarılması qərara alınmışdır.