OQTAY MİRQASIMOV:”ZAMANIN AXARINDA NƏSƏ BİR MÜQƏDDƏSLİK VAR...”
- “Ovsunçu” bədii filminin ideyasının nə vaxt və harada yaranması barədə tez-tez sual verirlər. Düşünürəm ki, hər bir yaradıcı adam üçün belə suala cavab vermək asan deyildir, hərçənd rejissor və ssenarist üçün ideyanın meydana gəlməsi və ssenarinin ərsəyə gətirilməsi filmin yaradılması işində ən başlıca mərhələdir. Ümumiyyətlə, bu ideya məni 14 il düşündürmüşdür. 1987-ci ildə ssenarini yazmağa başladım və 1989-cu ildə onu kinostudiyaya təqdim etdim.
Sonra mən aktyor heyəti barədə çox düşündüm. Filmin çəkilişi yalnız 2000-ci ildə başlandı. Ancaq təkcə uşaq roluna sınaq çəkilişləri aparırdım. Qalan bütün aktyorları götür-qoy etmədən dərhal seçmişəm. Məsələn, baş rolun ifaçısı Bəxtiyar Xanızadə ilə də belə oldu. Mən uzun illər ona göz qoyurdum. Onun xarici görünüşü, mənəvi aləmi, mədəni səviyyəsi mənim qəhrəmanıma çox uyğun gəlirdi. Fuad Poladov haqqında da belə deyə bilərəm. Bu halda da seçimimin düzgünlüyünə əsla şübhə etmirdim. Qızım Ayana gəldikdə isə, onu seçmək həm asan, həm də çətin idi. Axı, atalıq hissi məni aldada bilərdi. Amma, xoşbəxtlikdən, hər şey uğurlu oldu. Ümumiyyətlə, subyektivlik qorxusundan və səhv etməmək üçün mən tez-tez insanlara göz qoyuram, arabir bu və ya digər adama münasibətimi yoxlamağa çalışıram. Ayan uşaqlıqdan səhnədədir. Müəyyən mərhələdə mən onun peşəkarlığını yəqin etdim. Odur ki, seçimimin düzgünlüyünə əmin idim.
Ssenarinin hazır olduğu vaxtdan filmin çəkilişinin başlanmasınadək 10 il keçdi. Çünki “Azərkinovideo”nun baş direktoru olduqdan sonra planlar və vəsait bölgüsü məndən asılı idi. Mən də məsuliyyət hissi üzündən hər il öz layihəmi təxirə salırdım, axı, maliyyə çətinliklərimiz var idi. 2000-ci ildə isə belə bir imkan yarandı və filmi çəkdim.
Filmdən sonrakı dövr mənim üçün maraqlı işlə, o cümlədən çox sevdiyim ədəbi yaradıcılıqla yaddaqalan olmuşdur. “Aleks Ben Aron” Yermekin oğludur” adlı kinopovest, nəsr əsəri yazmışam. Bir hekayəmi, təəssüf ki, başa çatdırmamışam. Nəsr əsərlərimi çap etdirmək arzusundayam. Yeni “Bilyardçı” filmi üzərində işləmişəm. Əslinə qalsa, mənim günlərim işlə əlamətdardır. Ümumiyyətlə, mən təqvimin dəyişməsini fetişləşdirmirəm. Məncə, bu, əlamətdar hadisə deyil. Zamanın axarında nəsə bir müqəddəslik var və zənnimcə, onu rəqəmlərlə ayırmaq günahdır. Əlbəttə, insanlar bunu rahatlıq üçün ediblər.
Buna baxmayaraq, planlarımla maraqlanacağınızı əvvəlcədən görüb deməliyəm ki, mən dağlarda yaşayan və tarixdən xəbərsiz tərki-cahan deyiləm. 2004-cü ilə qədəm qoymuşuq və mənim də, əlbəttə, planlarım var. İlk növbədə, “Bilyardçı” tammetrajlı bədii filmini çəkmək niyyətindəyəm. Bu, 20-ci illərdə lal bilyardçının taleyi haqqında faciədir.
Lakin ailəmə də vaxt ayırmağa macal tapıram. Nə qədər ki sağam, mən bunu böyük məhəbbətlə edəcəyəm.
Bölmənin digər xəbərləri
