Naxçıvan Muxtar Respublikasının illərdən bəri blokadada olması Ordubad rayonuna da ağır təsir göstərmişdir. Bəs bu vəziyyətdən necə, hansı yollarla çıxmaq olar? 

Rayon icra hakimiyyətində keçirilən müşavirədə bu barədə geniş söhbət getmişdir. Rayon icra hakimiyyətinin başçısı Elşad Əliyev ötən il rayonda görülmüş işlər, qış mövsümünə hazırlıq, səhiyyə, təhsil sahəsində vəziyyət, əkinçilik və meyvəçiliyin inkişafı barədə məlumat vermişdir.

Bildirilmişdir ki, vergilərdən daxil olan vəsaitin rayonda qalması quruculuq işlərini xeyli genişləndirməyə şərait yaradır. Məsələn, ötən il rayonda abadlıq işlərinə 1 milyard manat xərclənmiş, rayon mərkəzi xəstəxanasına 100 milyon manatlıq avadanlıq alınmış, kəndlərdə telefonlaşdırma işləri sürətlənmişdir. Bu il Dəstə və Əylis kəndlərində, Arazqırağı zonada yeni torpaq sahələrinin əkilməsi ordubadlıların taxıla olan ehtiyacını ödəyəcəkdir.

Muxtar Respublika Ali Məclisinin sədri Vasif Talıbov müşavirədə çıxış edərək, qarşıda duran vəzifələrdən danışmış, qış mövsümündə elektrik enerjisindən istifadədə israfçılığın qarşısının alınması, vergilərin vaxtında toplanmasına diqqətin artırılması ilə bağlı tövsiyələrini vermişdir.

Müşavirədə rayonun sosial-iqtisadi inkişafı, habelə digər problemlərinin həllinə dair müxtəlif təkliflər səslənmişdir.