Ordumuz müasir gəncliyin vətənpərvərlik ruhunda formalaşmasında mühüm rol oynayır - ŞƏRH
Bakı, 25 iyun, AZƏRTAC
Bu bir həqiqətdir ki, güclü ordu ilə güclü dövlət anlayışı vəhdət təşkil edir. Çünki müstəqil dövlətin nüfuzu iqtisadi və siyasi potensialı ilə yanaşı, onun malik olduğu ordunun qüdrəti ilə də ölçülür. Azərbaycanda milli ordu quruculuğu çox çətin, mürəkkəb və ziddiyyətli mərhələlərdən keçmişdir. Əminliklə deyə bilərik ki, milli ordumuzun inkişaf tarixi Ulu Öndər Heydər Əliyevin adı ilə bağlıdır. Məhz Ulu Öndərin 1969-cu ildə Azərbaycanda birinci dəfə hakimiyyətə gəldikdən sonra müstəsna xidmətləri sayəsində ölkəmizdə hərbi kadrların hazırlanması prosesi başlandı. Ümummilli Liderin rəhbərliyi ilə ordu quruculuğu sahəsində aparılan işlər ölkəmizdə mütəşəkkil, qüdrətli ordu yaratmağa imkan verdi, onun gələcəkdə daha da möhkəmlənməsi üçün əsaslı zəmin yaratdı. Ümummilli Lider 1971-ci ildə böyük çətinliklərlə Azərbaycanda hərbi kadrlar hazırlayan məktəbin – Cəmşid Naxçıvanskinin adını daşıyan hərbi liseyin yaradılmasına nail oldu. Ulu Öndərin sayəsində gənclərimizin Bakı Ali Birləşmiş Komandanlıq və Bakı Ali Hərbi Dənizçilik məktəblərində oxumaları, eləcə də SSRİ-nin digər hərbi məktəblərinə güzəştli şərtlərlə qəbul olmaları mümkün oldu.
1991-ci ildə Azərbaycan dövlət müstəqilliyini bərpa etdikdən sonra ölkəmiz bütün sahələrdə olduğu kimi, hərbi sahədə də ciddi böhranla üzləşdi. Yalnız 1993-cü ildə Azərbaycan xalqının tələbi ilə Ümummilli Lider Heydər Əliyevin siyasi hakimiyyətə qayıdışı ölkədə ordu quruculuğu prosesini davam etdirdi. 1994-cü il may ayının 12-də “Bişkek protokolu” imzalandıqdan sonra Azərbaycanda Milli Ordunun formalaşması daha da sürətləndi.
Azərbaycan Prezidentinin 1998-ci il 22 may tarixli Fərmanına əsasən, Əlahiddə Azərbaycan Korpusunun yarandığı gün – 26 iyun Azərbaycan Respublikasının Silahlı Qüvvələr Günü elan olundu və hər il bu tarix rəsmi dövlət bayramı kimi qeyd edilir.
Bunu AZƏRTAC-a açıqlamasında Milli Məclisin deputatı Məzahir Əfəndiyev deyib.
Deputat ordu quruculuğu ilə bağlı həyata keçirilən tədbirlərin son 20 ildə Prezident İlham Əliyevin rəhbərliyi ilə yeni müstəvidə uğurla davam etdirildiyini vurğulayaraq deyib: “Silahlı Qüvvələrimizin istər peşəkar hazırlığı, maddi-texniki bazası daha da möhkəmləndirildi, hərbi qulluqçular, əsgərlərin sosial müdafiəsi sahələrində bir sıra zəruri tədbirlər həyata keçirildi, ümumilikdə ölkənin müdafiə xərcləri əhəmiyyətli dərəcədə artırıldı.
Azərbaycan Silahlı Qüvvələri qısa müddətdə regionun ən qüdrətli ordusuna çevrilib, 2020-ci ildə Ali Baş Komandanın əmrini – ən şərəfli missiyasını 44 gün müddətində dünya hərb tarixində görülməmiş peşəkarlıqla yerinə yetirərək 30 il həsrətində olduğumuz doğma Qarabağımızın işğaldan azad olunmasını həyata keçirdi, 2023-cü ildə isə suverenliyimizi tam bərpa etdi. Müharibədə iştirak edən Azərbaycan gəncliyinin, qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünya Azərbaycanın XXI əsrin hərb tarixinə yazılan şanlı Zəfərlərinin şahidi oldu.
Təsadüfi deyil ki, ordu quruculuğu prosesində Azərbaycan gəncliyinin yüksək iştirakçılığı prioritet istiqamətlərdən biri olaraq müəyyənləşdirilib. Belə ki, ordumuz müasir gəncliyin vətənpərvərlik ruhunda formalaşmasında, milli-mənəvi dəyərlərə bağlı, intizamlı vətəndaş kimi yetişməsində mühüm rol oynayır. Bu gün həm fiziki, həm də mənəvi olaraq sağlam, vətənpərvər Azərbaycan gəncliyinin yetişməsi gələcəkdə bütün sahələrdə əldə olunan nailiyyətlərin əsasını təşkil edəcək. Bu baxımdan, əminliklə deyə bilərik ki, artıq müasir Azərbaycan Ordusu ən yüksək standartlara cavab verir”.
Vətən müharibəsində qazanılan Zəfərin ordu quruculuğunda müəyyən islahatları şərtləndirdiyini bildirən deputat əlavə edib: “Azərbaycan Respublikası Prezidentinin tapşırığı ilə ordumuzda yeni təyinatlı Komando hərbi hissəsi, eyni zamanda, hərbi təhsil sahəsində idarəetmənin təkmilləşdirilməsi məqsədilə 2022-ci ildə Milli Müdafiə Universiteti yaradıldı. Təsadüfi deyil ki, silahlı qüvvələrimizin büdcəsi ildən-ilə artır. 2026-cı ilin dövlət büdcəsindən müdafiə və milli təhlükəsizlik xərclərinə 8 milyard 714,8 milyon manat vəsait yönəldilib. Dövlətimizin başçısının ali diqqət və qayğısı sayəsində Azərbaycan Silahlı Qüvvələri regionun ən qüdrətli ordusuna çevrilib.
Məhz güclü ordu və həyata keçirilən ardıcıl, çoxvektorlu xarici siyasət 2025-ci ilin avqustun 8-də Vaşinqtonda Amerika Birləşmiş Ştatlarının Prezidentinin iştirakı ilə Azərbaycan Prezidenti və Ermənistan Baş naziri arasında üçtərəfli Bəyannamənin imzalanması, regionda davamlı sülhün təmin olunması ilə nəticələndi. Beləliklə, Azərbaycanın istər ölkə səviyyəsində, istərsə də beynəlxalq səviyyədə əldə etdiyi bütün uğurlar yeni çağırışlara cavab verən mükəmməl, dayanıqlı idarəetmə modelinin tətbiqinin bariz nümunəsidir. Bu gün ordu quruculuğu istiqamətində görülən işlərin uğurla davam etdirilməsi Azərbaycan dövlətinin, xalqının qlobal arenada mövcud münaqişə ocaqlarına, müharibələrə baxmayaraq, dünyada xüsusilə, Cənubi Qafqazda sülhün, əmin-amanlığın, davamlı inkişafın carçısı olduğunun əyani sübutudur”.
Bölmənin digər xəbərləri
