Ötən il ərzində Azərbaycanın iri sənaye şəhərlərində yüksək çirklənmə halları qeydə alınmamışdır
Bakı, 24 yanvar (AZƏRTAC). 2013-cü ildə Azərbaycanın 8 iri sənaye şəhərində - Bakı, Sumqayıt, Gəncə, Mingəçevir, Şirvan, Naxçıvan, Lənkəran və Şəkidə yerləşən 26 müşahidə məntəqəsində atmosfer havasının çirklənməsinin monitorinqi aparılmışdır.
Ekologiya və Təbii Sərvətlər Nazirliyindən AZƏRTAC-a bildirmişlər ki, bir il ərzində aparılmış 92466 analizin nəticələrinə əsasən, həmin şəhərlərdə ifrat və yüksək çirklənmə halları qeydə alınmamışdır.
Bakıda əsas çirkləndiricilərdən tozun orta aylıq qatılığı 2,0 dəfə, azot 4-oksidin orta aylıq qatılığı 1,2 dəfə, hidrogen flüoridin orta aylıq qatılığı 1,8 dəfə, formaldehidin orta aylıq qatılığı 1,7 dəfə yol verilən qatılıq həddini keçmişdir. Sumqayıtda isə azot 4-oksidin orta aylıq qatılığı 2,25 dəfə, xlorun orta aylıq qatılığı 2,7 dəfə, hidrogen-flüoridin orta aylıq qatılığı isə 2,2 dəfə yol verilən qatılıq həddindən çox olmuşdur.
Mingəçevirdə atmosfer havasının tərkibindəki tozun orta aylıq qatılığının 1,3 dəfə, fenolun orta aylıq qatılığının 1,7 dəfə, Gəncədə hidrogen flüoridin orta aylıq qatılığının 1,6 dəfə, Şirvanda azot 4-oksidin orta aylıq qatılığının 1,5 dəfə normanı keçdiyi müəyyən edilmişdir.
Şəki, Naxçıvan və Lənkəranda isə atmosfer havasının çirklənməsi norma daxilində olmuşdur.
Bölmənin digər xəbərləri
