Papua-Yeni Qvineyada zəlzələ qurbanlarının sayı 80 nəfərə yüksəlib
Bakı, 5 mart, AZƏRTAC
Papua-Yeni Qvineyada ötən həftə baş vermiş 7,5 bal gücündə zəlzələ nəticəsində həlak olanların sayı artaraq 80 nəfərə çatıb.
AZƏRTAC xəbər verir ki, bu barədə New Zealand radiosu Qırmızı Xaç Cəmiyyətinə istinadla məlumat yayıb. Təbii fəlakətdən zərər çəkmiş Xela vilayətinin qubernatoru Filip Undialunun sözlərinə görə, yerli hakimiyyət orqanları ən ucqar rayonlara yetişə biliblər. Bu ərəfədə Papua-Yeni Qvineyada 6 bal gücündə yeni yeraltı təkanlar qeydə alınıb. Qubernator deyib ki, güclü afterşoklar vəziyyəti ağırlaşdıra və yeni qurbanlara gətirib çıxara bilər.
Xatırladaq ki, fevralın 26-da Papua-Yeni Qvineyada baş verən güclü zəlzələ dağıntılara və torpaq sürüşmələrinə səbəb olub.
Bölmənin digər xəbərləri
