PARALİMPİYAÇILARIMIZ QƏLƏBƏ ƏZMİNDƏDİRLƏR
AZƏRTAC xəbər verir ki, Milli Paralimpiya Komitəsinin vitse-prezidenti Ziyadxan Kərimov sentyabrın 15-də “Novosti” Beynəlxalq Mətbuat Mərkəzində keçirilən mətbuat konfransında bildirmişdir ki, paralimpiyaçılarımız 11 lisenziya qazanmışlar və bu, son nəticə deyildir. Onun sözlərinə görə, 2008-ci ilin sentyabrında Pekində keçiriləcək XIII Paralimpiya Oyunlarına daha 16-17 lisenziyanın qazanılacağı gözlənilir.
Z.Kərimov vurğulamışdır ki, ölkəmizdə 1996-cı ildən başlanan paralimpiya hərəkatı əsl inkişaf mərhələsinə İlham Əliyev Azərbaycan Milli Olimpiya Komitəsinin prezidenti seçildikdən sonra qədəm qoymuşdur.
Paralimpiyaçılarımız yüksək nəticələr əldə etmişlər. 2001-2007-ci illərdə Avropa və dünya çempionatlarında (A kateqoriyalı beynəlxalq yarışlar) idmançılarımız 19 qızıl, 9 gümüş, 31 bürünc medal qazanmışlar.
Milli Paralimpiya Komitəsinin baş katibi Afiq Süleymanov bildirmişdir ki, Pekin oyunlarına hazırlıq Afina Olimpiadasından sonra başlanmışdır. Bununla əlaqədar təsdiq edilmiş proqrama müvafiq olaraq məşqçilər, yığma komandanın tərkibi, növbəti 4 il üçün hazırlıq cədvəli müəyyən edilmişdir.
Mətbuat konfransında Pekində Paralimpiya oyunlarına hazırlığın gedişindən bəhs edən video material təqdim olunmuşdur. Paralimpiyaçılar üçün tikilən şəhərcikdə idmançılardan ötrü ideal texniki şərait yaradılmış, xüsusi avtobuslar ayrılmışdır.
Bölmənin digər xəbərləri
