PARİSDƏ AZƏRBAYCANA HƏSR OLUNMUŞ BEYNƏLXALQ KONFRANS
İNALKO-nun, Bakı Slavyan Universitetinin, Qafqaz Türkiyə Araşdırmalar Proqramının və Fransa Anadolu Tədqiqat İnstitutunun təşkilatçılığı, Azərbaycanın Parisdəki və Fransanın Bakıdakı səfirliklərinin köməyi ilə keçirilmiş konfransı giriş sözü ilə açan İNALKO-nun vitse-prezidenti Klod Aliber son zamanlar bir sox sahələrdə olduğu kimi, elm və təhsil sahəsində də Azərbaycanla Fransa arasında sıx əməkdaşlığın inkişafını xüsusi vurğulamış, Bakıya səfərini xatırlatmış, ölkəmizdə ali təhsildə əldə edilmiş uğurlardan, BSU ilə İNALKO arasında təməli qoyulmuş ədaqələrdən danışmışdır.
İlkin olaraq BSU-nun rektoru professor Kamal Abdullanın «Azərbaycan dili Şərq mədəniyyəti ilə əlaqə yaratmaqda əsas vasitədir» mövzusunda məruzəsi dinlənilmişdir. Məruzəçi əsas diqqəti Azərbaycan dilinin qədimliyinə yönəldərək, bu dilin «Kitabi-Dədə Qorqud» kimi möhtəşəm bir epik əsərin dili olduğunu, XIV-XV əsrlərdə Nəsiminin, XVI əsrdə Füzulinin əsərlərini bu dildə yaratdıqlarını, Qafqazın mühüm strateji rola malik olması sayəsində Azərbaycan dilinin region xalqları arasında ümumdanışıq dili kimi işləndiyini, böyük rus şairi M.Lermontovun dilimiz barədə dediyi kəlamları, Bestujev-Marlinski, Lev Tolstoy kimi ədiblərin, Qafqaz canişini N.Muravyovun Azərbaycan dilini öyrənmələri faktını xatırlatmışdır.
«Azərbaycan ədəbiyyatı müstəqillik dövründə (1991-2004)» mövzusunda məruzə ilə çıxış edən Azərbaycan Yazıçılar Birliyinin sədri, milli Məclisin deputatı Anar dünya mədəniyyətinin mərkəzlərindən sayılan Parisdə təşkil edilmiş konfransın ölkəmizin milli bayramlarından biri olan Respublika günü, Şərqdə ilk demokratik dövlətin təməlini qoymuş Azərbaycan Xalq Cümhuriyyətinin 86-cı ildönümündə keçirilməsini xoş bir məqam kimi qiymətləndirmişdir.
Sonra Bosfor Universitetinin müəllimi Sonel Bosnalı «Azərbaycan çoxsaylı dildirmi?», müstəqil fransız tədqiqatçısı Jil Otie «Azərbaycanda dil müxtəlifliyi» ,BSU-nun dosenti Elmira Fərəcullayeva «Azərbaycanda frankofon», İNALKO-nun türk dilləri departamentinin direktoru Mişel Bozdəmir «Fransada Azərbaycan dilinin tədrisi», Rəssamlıq Akademiyasının müəllimi, sənətşünaslıq elmləri doktoru Cəmilə Həsənzadə «Orta əsrlərdə Azərbaycan rəssamlığı» , «Simurq» cəmiyyətinin prezidenti, tarix elmləri doktoru Fuad Məmmədov «Azərbaycan mədəniyyəti mondalizasiya ilə üz-üzə», İNALKO-nun müəllimi Timur Mühidin «Türkiyə Respublikasında Azərbaycan ədəbiyyatının yayılması», Jan Mulən adına Lion-3 Universitetinin əməkdaşı Fransuaz Jenevre «Jorj Sand tərcüməsində Koroğlunun tarixi», Azərbaycan MEA-nın müxbir üzvü Fəridə Məmmədova «Azərbaycanlıların formalaşmasında albanlar», fransız tədqiqatçısı Jan-Lui Bak-Qramon «İctimai tarixin gözlənilməz qaynaqları: Azərbaycan qəbiristanlığı» , Qərb Universitetinin dosenti Reyhan Hüseynova «Klassik muğam: Azərbaycan mədəniyyətinin tərkib hissəsi» , Amerikanın Harvard Universitetinin Xəzər Araşdırmaları Mərkəzinin direktoru Brenda Şaffer «Azərbaycanda və İranda Azərbaycan milli kimliyi» , Qafqaz Turk Araşdırmalar Proqramı Bakı filialının əməkdaşı Bayram Balçı «İslamın yeniləşməsi, milli islam və xarici təsirlər» , türkiyəli doktarant Gültəkin Bürkü «Azərbaycanın iqtisadi əlaqələri və regional inteqrasiyanın perspektivləri» , İNALKO-nun müəllimi Şarl Ürjeviç «Azərbaycan Cənubi Qafqazın yeni faktoru ilə üz-üzə» mövzularında məruzələrlə çıxış etmişlər.
Konfransın gedişi zamanı muğam ifaçılığı ilə bağlı xanəndə Alim Qasımovun yaradıcılığından bəhs edən sənədli film nümayiş etdirilmiş, görkəmli bəstəkarlarımızdan Üzeyir Hacıbəyovun və Fikrət Əmirovun əsərlərindən parçalar, Vaqif Mustafazadənin ifasında musiqi nömrəsi səslənmişdir.
Ölkəmizin Fransadakı səfiri E.Hüseynova Respublika günü münasibətilə konfrans iştirakçılarını təbrik etmiş, bu tədbirin fransızların Azərbaycan xalqına dərin ehtiramının əlaməti olduğunu bildirmişdir. Azərbaycanın qonşu Ermənistan tərəfindən təcavüzə məruz qaldığını xatırladan səfir Avropa ictimaiyyətini bu ağrılı problemə biganə qalmamağa, onun sülh yolu ilə həllində səylərini artırmağa çağırmışdır.
Konfransın sonunda 1920-ci ildə Bakıda keçirilmiş Şərq xalqlarının birinci qurultayından bəhs edən sənədli film göstərilmişdir.
X X X
28 May - Respublika günü ilə əlaqədar Azərbaycanın Fransadakı səfirliyi Senatın binasında ziyafət təşkil etmişdir. Senatın Azərbaycan - Fransa dostluq qrupu sədrinin müavini senator Über Düran-Şaftal qonaqları əlamətdar bayram münasibətilə təbrik edərək, ölkələrimiz arasında dostluq və əməkdaşlığın inkişafından böyük məmnunluq duyduğunü bildirmiş və xalqımıza xoş arzularını ifadə etmişdir.
Bölmənin digər xəbərləri
