PARİSDƏ AZƏRBAYCANLA BAĞLI ELMİ SİMPOZİUM KEÇİRİLMİŞDİR
Simpoziumu giriş sözü ilə açan Konqresin sədri Cavad Derəxti dünyada 40 milyondan artıq azərbaycanlının yaşadığını, xaricdəki soydaşlarımızın fəaliyyətində son zamanlar nəzərəçarpacaq irəliləyiş olduğunu və bir çox ölkələrdə bu sahədə təşkilatlanma işi aparıldığını bildirmiş, öz həyatlarını Azərbaycanın müstəqilliyinə həsr etmiş insanların mübarizəsindən danışmış, ulu öndərimiz Heydər Əliyevin Azərbaycan diasporunun möhkəmlənməsi sahəsindəki xidmətlərini yüksək qiymətləndirmişdir.
Gürcüstanın Fransadakı səfiri N.Caparidze çıxışında Azərbaycan və gürcü xalqlarının qədim dostluğundan bəhs etmiş, müstəqil Azərbaycan və Gürcüstan arasında hərtərəfli, sıx əlaqələr yarandığını və inkişaf etdiyini, bu işdə dövlət başçılarının döstluq münasibətlərinin rolunu vurğulamışdır.
Gürcüstan parlamentinin deputatı Kamal Muradxanlı, Azərbaycan Prezidentinin İcra Aparatının ictimai-siyasi şöbəsinin bölmə müdiri Qafar Əliyev, professor Paşa Qəlbinur, xalq artisti İlhamə Quliyeva və başqaları dünyada görkəmli siyasi xadim və təcrübəli dövlət başçısı kimi tanınan ümummilli liderimiz Heydər Əliyevin dünya azərbaycanlılarını bir araya gətirmək və onları doğma vətənləri Azərbaycan ətrafında birləşdirmək naminə xüsusi səylər göstərdiyini, Dünya azərbaycanlılarının həmrəylik gününü təsis etdiyini xüsusi vurğulamış, ölkəmizin Avropa dəyərlərinə hərtərəfli inteqrasiyasından söhbət açmışlar.
Milli Məclisin deputatı, xalq şairi Sabir Rüstəmxanlı Azərbaycanı və azərbaycanlıları dünya xalqlarına tanıtmaq, ölkəmizlə bağlı həqiqətləri beynəlxalq ictimaiyyətə çatdırmaq sahəsində belə tədbirlərin keçirilməsinin xüsusi əhəmiyyət daşıdığını bildirmişdir.
Fransa Demokratik və Strateji Araşdırmalar Mərkəzinin sədri Jan-İv Şevalye bu il ölkəmizə iki dəfə səfər etdiyini, sonuncu səfəri zamanı 25 nəfərlik beynəlxalq müşahidəçilər qrupunun tərkibində noyabrın 6-da keçirilmiş parlament seçkilərini izlədiyini xatırlatmış, beynəlxalq aləmdə nüfuzu getdikcə artan, Cənubi Qafqaz bölgəsində aparıcı dövlətə çevrilən Azərbaycanda seçkilərin Avropa standartlarına uyğun, demokratik şəkildə keçirildiyini xatırlatmışdır. Müşahidəçi kimi iştirak etdiyi məntəqədə heç bir pozuntu hallarına yol verilmədiyini söyləmişdir.
Ölkəmizin iqtisadi inkişafından danışan cənab Şevalye yeraltı və yerüstü sərvətlərlə zəngin Azərbaycanın qısa bir vaxtda bütün sahələrdə yüksək nailiyyətlər qazandığını, yaxın gələcəkdə onun qüdrətli və inkişaf etmiş bir dövlətə çevriləcəyinə əmin olduğunu bildirmişdir.
Simpoziumda həyatlarını Azərbaycanın azadlığına həsr etmiş insanların, o cümlədən Seyid Cəfər Pişəvərinin xidmətlərindən danışılmış, “Qarabağ şikəstəsi” bədii filmi nümayiş etdirilmiş, iştirakçılara Azərbaycan ərazisinin 20 faizini işğal etmiş Ermənistan silahlı qüvvələrinin törətdiyi faciələrdən bəhs edən kitabçalar və məlumat diskləri paylanmışdır.
Simpoziumda tariximizin faciəli səhifəsi olan Xocalı soyqırımının ildönümü ilə əlaqədar 2006-cı ilin fevralında Avropa İttifaqının iqamətgahının yerləşdiyi Brüsseldə yığıncaq və nümayiş keçirilməsi qərara alınmışdır.
Tədbirin sonuncu günü iştirakçılar Azərbaycan Xalq Cümhuriyyəti parlamentinin sədri Əlimərdan bəy Topçubaşovun və Ceyhun Hacıbəylinin Parisin yaxınlığındakı Sən-Klu qəbiristanlığındakı məzarlarını ziyarət etmişlər.
Bölmənin digər xəbərləri
