Parkinson xəstəliyinin gözlənilməz təhrikçisi aşkar edilib
Bakı, 26 sentyabr, AZƏRTAC
Ağız boşluğunda yaşayan bəzi bakteriyalar bağırsağa düşdükdə beyin neyronlarını zədələyə və Parkinson xəstəliyinin inkişafına təkan verə bilər. Sonqyunqvan Universiteti və Seul Milli Universitetinin alimləri bu nəticəyə gəliblər.
AZƏRTAC xəbər verir ki, tədqiqat “Nature Communications” (“NatCom”) jurnalında dərc olunub.
Araşdırmanın mərkəzi obyekti kariyesin törədicisi olan “Streptococcus mutans” bakteriyası olub. Alimlər müəyyən ediblər ki, Parkinson xəstəliyindən əziyyət çəkən insanların bağırsaqlarında bu bakteriyanın miqdarı xeyli yüksəkdir. Bundan əlavə, o, urokanatreduktaza (UrdA) fermenti və imidazolpropionat (ImP) metaboliti ifraz edir. İkincisi bağırsaqdan qana keçərək beyinə qədər çata bilir.
Siçanlar üzərində aparılan təcrübələr göstərib ki, “S. Mutans” və ya “UrdA” sintez edən genetik dəyişdirilmiş E. coli təsirə məruz qaldıqda heyvanların beyin və qanında ImP səviyyəsi yüksəlir. Bu isə dofamin neyronlarının məhvi, neyroiltihab, hərəkət pozuntuları və Parkinson xəstəliyinin inkişafı ilə bağlı olan alfa-sinuklein zülalının toplanması ilə müşayiət olunub.
Alimlər həmçinin aşkar ediblər ki, bu təsirlər “mTORC1” siqnal kompleksinin aktivləşməsi ilə bağlıdır. Təcrübə aparılan heyvanlarda bu yolun dərman vasitəsilə bloklanması iltihabı azaldır, neyronları qoruyur motor funksiyalarını yaxşılaşdırır.
Tədqiqatçılar vurğulayırlar ki, bağırsaq mikroflorasının tənzimlənməsi neyrodegenerativ xəstəliklərin profilaktikası və müalicəsində perspektivli istiqamət ola bilər.
Bölmənin digər xəbərləri
