Pediatrların qurultayında “Uşaqların sağlamlığı: məktəbin və cəmiyyətin prioriteti” mövzusunda fikir mübadiləsi aparılıb
Bakı, 28 oktyabr, AZƏRTAC
“Azərbaycan Pediatrlar Assosiasiyasının 42-ci Milli Qurultayı” öz işinə başlayıb. Tədbir çərçivəsində İctimai Səhiyyə və İslahatlar Mərkəzində “Uşaqların sağlamlığı: məktəbin və cəmiyyətin prioriteti” mövzusunda dəyirmi masa keçirilib.
AZƏRTAC xəbər verir ki, dəyirmi masada TƏBİB, İcbari Tibbi Sığorta üzrə Dövlət Agentliyi, Səhiyyə Nazirliyi İctimai Səhiyyə və İslahatlar Mərkəzi, Səhiyyə Nazirliyi Respublika Gigiyena və Epidemiologiya Mərkəzi, Əziz Əliyev adına Azərbaycan Dövlət Həkimləri Təkmilləşdirmə İnstitutu, K.Y. Fərəcova adına Elmi-Tədqiqat Pediatriya İnstitutu, Bakı Baş Səhiyyə İdarəsi, Azərbaycanın Tibb Universiteti, Ailə, Qadın və Uşaq Problemləri üzrə Dövlət Komitəsi, Azərbaycan Respublikasının İnsan Hüquqları üzrə Müvəkkili (Ombudsman) aparatı, Elm və Təhsil Nazirliyi, universitetlərin kafedra müdirləri, ümumtəhsil məktəblərinin direktorları, səhiyyə mərkəzlərinin həkimlər və ictimai təşkilatların nümayəndələri iştirak ediblər.
Açılış nitqində İctimai Səhiyyə və İslahatlar Mərkəzinin direktoru Səbinə Babazadə bildirib ki, uşaqların sağlamlığı təkcə tibbi xidmətlərlə təmin olunmamalıdır. Məktəb mühiti, ailə təhsili və maarifləndirmə ilə birgə bu sahədə uğurlar əldə olunur.
Səhiyyə Nazirliyinin sektor müdiri Aynurə Zeynalova uşaq və yeniyetmələrin sağlamlığının qorunmasının dövlət siyasətində prioritet istiqamət olduğunu bildirib. O, müasir tibbi yanaşmalar sayəsində ana və uşaq ölümünün əhəmiyyətli dərəcədə azaldığını diqqətə çatdırıb və profilaktik tədbirlərin geniş tətbiqinin vacibliyini vurğulayıb.
Tədbir uşaqların sağlamlığının qorunması, müasir profilaktik tədbirlərin tətbiqi və tibbi xidmətlərin keyfiyyətinin artırılması sahəsində əhəmiyyətli platforma kimi qiymətləndirilib.
Bundan əlavə, gələcək üçün bir sıra innovativ təkliflər də irəli sürülüb. Ekspertlər məktəblərdə “ağıllı həkim kabinetləri”nin yaradılmasını, uşaqların sağlamlıq kartı ilə təmin olunmasını, dispanserizasiyanın və profilaktik baxışların sistemli şəkildə təşkilini, eləcə də “sağlamlıq dərsləri” vasitəsilə həm uşaqların, həm də valideynlərin tibbi maarifləndirilməsini vacib hesab ediblər.
Bölmənin digər xəbərləri
