Pekin Xarici Dillər Universitetinin nümayəndə heyəti Azərbaycana səfər edəcək
Pekin, 29 oktyabr, AZƏRTAC
Çinin nüfuzlu ali təhsil ocaqlarından olan Pekin Xarici Dillər Universitetinin (PXDU) prorektoru professor Gao Qanqın rəhbərliyi ilə nümayəndə heyəti Azərbaycana səfər edəcək.
AZƏRTAC xəbər verir ki, səfər çərçivəsində Bakı Dövlət Universiteti, Azərbaycan Milli Elmlər Akademiyası, Azərbaycan Dövlət İqtisad Universiteti və Xəzər Universitetində görüşlər keçiriləcək, yeni anlaşma müqavilələri imzalanacaq.
Səfərin əsas məqsədi PXDU-da Azərbaycan dili ixtisasının tədrisinin inkişafı, iki ölkə arasında elm və təhsil əlaqələrinin dərinləşdirilməsi, tələbə və tədqiqatçıların mübadiləsi, ikili diplom proqramlarının təşkili, Azərbaycanda Çin dilinin tədrisinə dəstək və digər məsələləri müzakirə etməkdir. Səfər çərçivəsində prorektor Gao Qanqın Xəzər Universitetində mühazirəsi nəzərdə tutulub.
Nümayəndə heyətinə universitetin Asiya fakültəsinin dekanı professor Su Yinqyinq, təhsil ocağının Azərbaycan dili kafedrasının və ixtisasının təsisçi müdiri filologiya üzrə fəlsəfə doktoru Aqşin Əliyev daxildir.
Qeyd edək ki, Çin Təhsil Nazirliyinin 2015-ci ildə PXDU-da Azərbaycan dili ixtisasının yaradılması ilə bağlı qərarına uyğun olaraq, bir il sonra Aqşin Əliyevin rəhbərliyi ilə kafedra təsis edilib. İlkin mərhələdə Azərbaycan dili üçüncü dil kimi tədris olunsa da, 2018-ci ildə ümumrespublika imtahanı əsasında Azərbaycan dili ixtisasına qəbul aparılıb və 9 tələbə dörd il ərzində Azərbaycan dilini öyrənərək, Çinin ilk azərbaycanşünas kadrları olub. 2023-cü ildə yenidən Azərbaycan dili ixtisasına qəbul keçirilib. Hazırda 8 tələbə bakalavriat səviyyəndə Azərbaycan dili ixtisası üzrə təhsil alır. PXDU Xəzər Universiteti, Azərbaycan Milli Elmlər Akademiyası, Bakı Dövlət Universiteti, Azərbaycan Dövlət İnformasiya Agentliyi (AZƏRTAC) və digər qurumlarla sıx əməkdaşlıq edir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
