Pərviz Şahbazov: 2030-cu ilədək dünyada enerji saxlanc sistemləri 1500 giqavata yüksəldilməlidir
Bakı, 30 sentyabr, AZƏRTAC
Energetika naziri Pərviz Şahbazov Bakı İqlim Fəaliyyəti Həftəsində (BCAW2025) “Beynəlxalq Əməkdaşlıq və Dayanıqlı, Təmiz və Ədalətli Enerji Keçidinin Sürətləndirilməsi” mövzusunda çıxış edib.
Energetika Nazirliyindən AZƏRTAC-a bildirilib ki, nazir Bakı İqlim Fəaliyyəti Həftəsinin qlobal iqlim gündəliyinin icrasını yerli və regional səviyyədə sürətləndirən nüfuzlu platforma kimi COP29-un nəticələrinin reallaşdırılması və təmiz, ədalətli enerji keçidinin irəlilədilməsi baxımından xüsusi əhəmiyyətini vurğulayıb. COP29-un qlobal iqlim fəaliyyətinə güclü impuls verərək ədalətli həllər və bərpaolunan enerjinin sürətli inkişafı istiqamətində yeni üfüqlər açdığını deyən nazir bildirib ki, burada dövlət başçısının Azərbaycanın beynəlxalq arenada mövqeyini gücləndirən, “yaşıl artım” və “yaşıl enerji” ölkəsi kimi inkişafını təmin edən uzaqgörən strateji liderliyi və iqlim dəyişikliklərinə qarşı qlobal mübarizədə təşəbbüskarlığı misilsiz rol oynayıb.
“Xüsusilə, Azərbaycan Respublikasının Prezidenti İlham Əliyevin günəş və külək layihələrinin inkişafını, Qarabağ, Şərqi Zəngəzur və Naxçıvanın yaşıl enerji zonasına çevrilməsini, ölkənin enerji sisteminin dayanıqlılığını təmin edən və şaxələndirilmiş nəql infrastrukturlarının yaradılmasını hədəfləyən siyasəti COP29-un enerji təşəbbüslərinin əsas hərəkətverici qüvvəsi oldu. İndiyədək 67 ölkə, “Qlobal Enerji Saxlama və Şəbəkələr Öhdəliyi”nə, 66 ölkə “Hidrogen Bəyannaməsi”nə, 59 ölkə isə “Yaşıl Enerji Öhdəliyi”nə qoşulub”,- deyə nazir qeyd edib.
Nazir Pərviz Şahbazov bildirib ki, 2030-cu ilədək dünyada 1,5 dərəcə hədəfinə çatmaq üçün bərpaolunan enerjinin istehsal gücünü 11 min giqavata çatdırmaq kifayət deyil, həmçinin enerji saxlanc sistemləri 1500 giqavata yüksəldilməli, 25 milyon kilometr elektrik şəbəkəsi inşa və ya yenilənməli, istehsal və tələbat mərkəzlərini birləşdirən, regionlararası sistemlərdə qarşılıqlı dayanıqlığı təmin edən enerji dəhlizləri yaradılmalıdır.
Qeyd olunub ki, Azərbaycan 2030-cu ilədək şəbəkənin maksimum inkişaf imkanlarına uyğun olaraq 2,7 giqavat gücündə külək- günəş elektrik stansiyalarının inşasını planlaşdırır. Bu addım ölkəmizdə bərpaolunan enerjinin quraşdırılmış gücünü üç dəfə artıraraq 4 giqavata çatdırmaqla, 3,2 milyon ton istixana qazı emissiyasının qarşısını alacaq. Növbəti iki il ərzində şəbəkəyə 10 yeni stansiya və 2 giqavatlıq bərpaolunan enerji gücünün idarə olunması üçün 250 meqavat gücündə və 500 meqavat/saat saxlama həcminə malik batareya sistemləri inteqrasiya ediləcək. Bu stansiyalardan biri, 240 meqavat gücündə “Xızı-Abşeron” Külək Elektrik Stansiyası isə noyabr ayında istifadəyə veriləcək. Həmçinin 2030-cu ilədək Qarabağ və Şərqi Zəngəzurda hidro, günəş, külək stansiyaları və damüstü panellər hesabına istehsal gücünün 1,6 giqavata çatacağı, nəticədə 2 milyon tondan çox emissiyanın azaldılacağı bildirilib.
Çıxışda Azərbaycanın regional müstəvidə enerji keçidi və iqlim hədəflərinə töhfə verən, Cənubi Qafqazı, Mərkəzi Asiyanı, Türkiyə və Avropanı birləşdirən yaşıl enerji dəhlizləri layihələrindən də bəhs edilib: “2032-ci ilədək quruda və dənizdə yaradılacaq 6 giqavatdan çox gücün 4 giqavatının “Xəzər-Qara dəniz-Avropa” yaşıl enerji dəhlizi ilə mərhələli şəkildə ixracına başlanması planlaşdırılır ki, bu da təxminən 4,5 milyon ton emissiyanın azaldılmasına bərabərdir”.
Bölmənin digər xəbərləri
