Politoloq: 2019-cu ilin nəticələrinə əsasən Azərbaycan özünün yüksək inkişaf səviyyəsinə çatıb
Bakı, 7 fevral, AZƏRTAC
Beynəlxalq müşahidəçilərin, politoloqların, ekspertlərin gəldikləri ümumi rəy onu deməyə əsas verir ki, 2019-cu ilin nəticələrinə əsasən Azərbaycan özünün yüksək inkişaf səviyyəsinə çatıb. Ölkəmizdə iqtisadi, siyasi və hərbi sahələrdə müsbət irəliləyişlər qeydə alınıb.
Bu sözləri AZƏRTAC-a müsahibəsində siyasi ekspert, politoloq Elxan Ələsgərov deyib.
Siyasi ekspert bildirib: “Ötən il Azərbaycan müstəqil siyasət yürüdərək Ermənistan xaric olmaqla, qonşu və digər ölkələrlə əməkdaşlıq əlaqələrini daha da genişləndirib. Həm də bu əməkdaşlıq əlaqələri normal işgüzar, hətta yaxın tərəfdaşlıq münasibətləri əsasında qurulub. Həmin ölkələr arasında Rusiyanı xüsusi qeyd etmək lazımdır. Prezident İlham Əliyevin Rusiya Prezidenti Vladimir Putinlə keçirdiyi çoxsaylı görüşlərdə ölkələrimiz arasında münasibətlərin daha da inkişaf etdirilməsi, müxtəlif sahələrdə əməkdaşlıq əlaqələrinin genişləndirilməsi üzrə müzakirələr aparılıb və anlaşma sənədləri imzalanıb. Ölkəmiz qonşu İran və Gürcüstan ilə yüksəksəviyyəli münasibətləri qoruyub saxlayıb. Azərbaycan Xəzəryanı ölkələrlə - Qazaxıstan, Türkmənistan və Özbəkistan ilə əlaqələrini da gücləndirib”.
Azərbaycanın regionda geostrateji, geoiqtisadi layihələrin təməlini qoyan yeganə ölkə olduğunu bildirən Elxan Ələsgərov bildirib ki, neft-qaz sahəsində reallaşdırılan layihələr, inşa edilən boru kəmərləri, o cümlədən Avropaya qazın ixracı ilə bağlı TANAP və TAP layihələri, Şimal-Cənub, Şərq-Qərb nəqliyyat dəhlizləri, eyni zamanda, Xəzəryanı ölkələrlə dəniz ticarətinin inkişafı deyilənləri bir daha sübut edir.
Onun sözlərinə görə, ötən il Azərbaycan Ordusu əvvəlki illərlə müqayisədə daha da təkmilləşib. Hərbi araşdırmalar onu deməyə əsas verir ki, orduda idarəetmə və döyüş hazırlığı yüksək səviyyədədir. Bu da onu göstərir ki, Azərbaycan Ordusu kifayət qədər güclənib.
Prezident İlham Əliyevin rəhbərliyi ilə Azərbaycanın müstəqil daxili və xarici siyasət yürütdüyünü bildirən politoloq deyib: “Məhz bu siyasətin nəticəsidir ki, təkcə qonşu ölkələrlə deyil, həm də Avropa ölkələri, ABŞ, Çin ilə dostluq və əməkdaşlıq münasibətləri yaradılıb. Buraya NATO ilə əməkdaşlığı da əlavə etmək lazımdır. Beynəlxalq təşkilatların, o cümlədən Avropa Şurasının Azərbaycanın ərazi bütövlüyünə göstərdiyi dəstək ölkəmizin dünya miqyasında nüfuzunun təzahürüdür. Bütün bunlar Azərbaycanın müstəqil siyasətinin uğurlarıdır”.
Yaxın Şərqdə vəziyyətin qeyri-sabit olduğunu, ABŞ ilə İrana arasında gərginliyin artdığını və bunun nəticəsində bölgədə qeyri-müəyyənliyin yarandığını qeyd edən politoloq deyib: “Bu proseslər Azərbaycanın yerləşdiyi regionda baş verir. Buna baxmayaraq, ölkəmiz öz daxili resurslarından səmərəli şəkildə faydalanır, neft və qaz yataqlarını özü istismar edir və karbohidrogen ehtiyatlarının ixracından əldə etdiyi gəliri sosial layihələrə, vətəndaşlarının rifah halının yaxşılaşdırılmasına yönəldir. Bütün bunlar ölkəmizdə insan amilinə verilən dəyərin göstəricisidir” - deyə politoloq vurğulayıb.
Bölmənin digər xəbərləri
