Politoloq: Azərbaycan-Türkmənistan əməkdaşlığı Türk dünyasının möhkəmlənməsinə xidmət edir
Bakı, 25 avqust, AZƏRTAC
Azərbaycan Prezidenti İlham Əliyevin Türkmənistana səfəri, orada keçirdiyi görüş və müzakirələr beynəlxalq miqyasına görə çox əhəmiyyətlidir. Coğrafi baxımından kiçik olan Azərbaycan böyük beynəlxalq layihələrin əsas iştirakçısına, qurucusuna, layihə rəhbərinə çevrilib. Formalaşmaqda olan yeni dünya düzənində ölkəmiz təkcə Cənubi Qafqaz, Türküstan (Mərkəzi Asiya) bölgəsi deyil, bütün dünya üçün yeni strategiya, münasibətlər yaradır. Əlbəttə, bu siyasətin memarı Prezident İlham Əliyevdir.
Bu sözləri AZƏRTAC-a açıqlamasında politoloq Yalçın Hacızadə söyləyib.
O bildirib ki, Azərbaycan dövlətinin həyata keçirdiyi siyasət, atılan hər bir addım vahid bir konsepsiyanın tərkib hissəsidir. Bu konsepsiya ölkəmizi regionun liderinə, təhlükəsizlik qarantına çevirib. Bizdə belə bir atalar sözü var “əgər sülh istəyirsənsə, müharibəyə hazır ol”. Biz 2020-ci ildə müharibə etməklə regionumuzda sülhə nail olduq. Bu gün hətta Ermənistanın Baş naziri Nikol Paşinyan və komandası “Qarabağ düyünündən” qurtulmağın sevincini yaşayırlar və erməni xalqına çatdırmağa çalışırlar ki, bununla daha da müstəqil olacağıq.
Qarabağda qalibiyyət təkcə regionumuzu kənar qüvvələrin təsirindən qurtarmadı, eyni zamanda, Türküstan bölgəsindəki ölkələrin də müstəqil, milli maraqlara söykənən siyasət yeritməsinə təkan verdi. Prezident İlham Əliyevin son zamanlar Türkmənistanla bağlı apardığı siyasət Türkmənistanın enerji resurslarının Qərbə daşınmasına, onun nəqliyyat–kommunikasiya imkanlarının artmasına və beynəlxalq əhəmiyyətinin yüksəlməsinə aparır. Türkmənistan Orta Dəhliz layihəsində əhəmiyyətli coğrafi mövqeyə malikdir və əlaqələrin inkişafı Trans - Xəzər xəttinin imkanlarını artırır.
“Azərbaycanın həyata keçirdiyi siyasət Türk Dövlətləri Təşkilatına inamı artırır. Həmin Təşkilata kənardan baxan Türkmənistanın isə inteqrasiyasını sürətləndirir. Bu səfər, həmçinin Türk Dövlətlərinin birliyinə strateji dəstəkdir. Bu Təşkilatın qlobal miqyasda nüfuzu artır, onun siyasi, iqtisadi və mədəni gücü beynəlxalq münasibətlərdə mühüm faktor kimi qəbul olunur. Azərbaycanın və Türkmənistanın bu təşkilatdakı əməkdaşlığı, şübhəsiz ki, bütövlükdə Türk dünyasının möhkəmlənməsinə xidmət edir.
Xəzərin hər iki sahilində yerləşən qardaş ölkələr öz gələcəklərini ortaq maraqlar əsasında qurmaqda qərarlıdır. Bu qərarlılıq isə nəinki regional sabitlik, həm də Avrasiya məkanında yeni əməkdaşlıq formatlarının yaranmasına yol açır. Azərbaycanı və Türkmənistanı birləşdirən əsas sahələrdən biri enerji sektorudur. Xəzərin zəngin karbohidrogen ehtiyatlarının rasional istifadəsi və beynəlxalq bazarlara çatdırılması məsələsində iki ölkənin ortaq mövqeyi mövcuddur. Trans-Xəzər layihələri, enerji dəhlizlərinin diversifikasiyası və Avropa bazarlarına çıxış imkanları qarşılıqlı fayda prinsiplərinə əsaslanır. Bununla yanaşı, Bakı ilə Aşqabad arasında nəqliyyat sahəsində əməkdaşlıq da yeni mərhələyə qədəm qoyur. Azərbaycan Orta Dəhlizin aparıcı ölkələrindən biridir və Türkmənistanla bu sahədə inteqrasiya həm regional ticarətin, həm də Şərq-Qərb bağlantılarının möhkəmlənməsinə xidmət edəcək. Səfər zamanı əldə olunan razılaşmalar bu perspektivi daha da gücləndirdi.
Siyasi və iqtisadi məsələlərlə yanaşı, Azərbaycanla Türkmənistan arasında humanitar sahədə əməkdaşlıq da xüsusi önəm daşıyır. İki xalqı birləşdirən dərin köklər, ədəbiyyat, musiqi və mədəniyyət sahəsindəki ortaq dəyərlər dövlətlərarası münasibətlərin davamlılığını təmin edir. Prezident İlham Əliyevin səfərində bu məsələlərin gündəmə gətirilməsi göstərir ki, Bakı üçün diplomatiya təkcə iqtisadi maraqlarla məhdudlaşmır, mənəvi bağların möhkəmlənməsi də əsas hədəflərdən biridir”, - deyə Y.Hacızadə vurğulayıb.
Politoloqun sözlərinə görə, Azərbaycan Prezidenti Türkmənistan səfərində bir daha nümayiş etdirdi ki, ölkəmizin xarici siyasət kursu regional sabitliyə və qarşılıqlı hörmətə əsaslanır. Xəzər hövzəsində balanslı siyasət yürütmək, qonşu dövlətlərlə əməkdaşlıq etmək və qarşılıqlı maraqlar əsasında strateji tərəfdaşlıq qurmaq Azərbaycanın mövqeyini gücləndirir. Səfərin nəticələri göstərdi ki, Azərbaycanla Türkmənistan arasında münasibətlər yalnız ikitərəfli çərçivə ilə məhdudlaşmır. Bu əməkdaşlıq Avrasiya məkanında yeni nəqliyyat və enerji xəritələrinin formalaşmasına və ümumilikdə beynəlxalq münasibətlərdə yeni güc balansının yaranmasına xidmət edir.
Hər hansı bir siyasi ideologiya və nəzəriyyə iqtisadi maraqlara söykənmir və ya iqtisadi əlaqələrlə gücləndirilmirsə həmin ideologiya özünü doğrultmur və yaşamır. Azərbaycanın regionumuzda sülhün təmin olunması sahəsində apardığı siyasət, Türk Dövlətləri Təşkilatının möhkəmlənməsində göstərdiyi fəaliyyət, beynəlxalq layihələrin qurulması və inkişafı sahəsində addımları həm də bərabər iqtisadi maraqlara və əməkdaşlığa söykənir. Azərbaycan, Özbəkistan və Türkmənistan liderlərinin görüşü və imzalanan sənədlər də bu məqsədin davamıdır.
Bölmənin digər xəbərləri
