SİYASƏT
Politoloq: Prezident İlham Əliyevin Gürcüstana səfəri Cənubi Qafqazda böyük barışın başlanğıcını qoydu
Tbilisi, 9 oktyabr, AZƏRTAC
Azərbaycan Respublikasının Prezidenti İlham Əliyevin oktyabrın 8-də Gürcüstana səfəri çox böyük əhəmiyyətə malik idi. Bu səfərin nəticələri təkcə Cənubi Qafqaz ölkələrinin deyil, dünyanın maraq dairəsindədir.
Bu fikri AZƏRTAC-a müsahibəsində politoloq, “Şəffaf Qafqaz” təşkilatının rəhbəri Mübariz Qarayev söyləyib. Onun sözlərinə görə, bu gün dünyanın diqqəti Cənubi Qafqazdadır. Azərbaycan 2020-ci ildəki 44 günlük Vətən müharibəsi zamanı öz ərazi bütövlüyünü bərpa etdi. Bu il sentyabrın 20-də keçirilmiş lokal antiterror tədbirləri nəticəsində isə Azərbaycan öz konstitusion dövlət quruluşunu bərpa etməklə bölgədə yeni eranın başlanğıcını qoydu.
“İlk növbədə qeyd olunmalıdır ki, Prezident İlham Əliyevin Gürcüstana bu səfəri əslində Cənubi Qafqazda böyük barışın, sülhün və sabitliyin başlanğıcını qoydu.
Prezident İlham Əliyevin və Gürcüstanın Baş naziri İrakli Qaribaşvilinin Tbilisidə verdikləri bəyanatlar bir çox məqamları üzə çıxarıb.
Azərbaycan Prezidentinin verdiyi bəyanatlara əsasən demək olar ki, Cənubi Qafqaz dünyanın yeni quruluşunun mərkəzinə çevriləcək və Azərbaycan ilə Gürcüstan da bu mərkəzin əsas aparıcı dövlətləri olacaq”.
Politoloq hesab edir ki, Ermənistanın da bu çağırışlara qoşulması daha böyük səmərə verəcək. Ermənistan rəhbərliyinin Azərbaycan və Gürcüstan liderlərinin sülh çağırışlarına qoşulması ilə həm də Türkiyə Prezidenti Rəcəb Tayyib Ərdoğanın təklif etdiyi 3+3 formatının təməli qoyula bilər. Bu isə daha böyük birliyin və daha güclü inkişafın əsasını qoyacaq.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
