Politoloq: Yaxın vaxtlarda Azərbaycanla Türkiyə arasında çox vacib sazişlərin imzalanmasının şahidi olacağıq
Bakı, 27 oktyabr, AZƏRTAC
Türkiyə ilə Azərbaycan arasındakı münasibətlər strateji əhəmiyyəti ilə seçilir. Türkiyə-Azərbaycan münasibətlərinin bugünkü səviyyəsi tarixdə iki ölkə, xalq arasında ən dərin və inkişaf etmiş əlaqələrdir desək, yəqin ki, yanılmarıq. Dünyanın hegemon dövlətlərinin uzun müddət bölgədəki ədalətlilik prinsiplərini heçə saymaları, ikili standartlar yürütmələri və Azərbaycana qarşı aparılmış siyasət Türkiyə ilə ölkəmizin daha dərindən inteqrasiya etməsinə gətirib çıxaran amillərdən ən başlıcası olub. 44 günlük müharibə dövründə Azərbaycan Türkiyənin siyasi dəstəyi ilə hərbi-texniki əməkdaşlıq çərçivəsində bir sıra uğurlara imza atdı. Sirr deyil ki, Azərbaycan dövləti öz münasibətlərində bütün region ölkələri ilə qonşuluq prinsiplərini daim əsas tutub. Həmçinin hər zaman bütün ölkələrə qarşı münasibətlərində ən ülvi dəyərləri öz siyasətində əsas götürüb. Lakin təəssüf ki, heç də bütün qonşular və bütün dövlətlər Azərbaycana qarşı səmimi olmayıb. Bunun əksinə olaraq, rəsmi Bakı ilə Ankara arasındakı münasibətlərdə daim səmimiyyətin, ədalətin başlıca prinsip olduğuna şahidlik edirik. Türkiyə Prezidentinin Qarabağa səfəri, məhz Türkiyədən havaya qalxan təyyarənin Füzuliyə enişi sözsüz ki, tarixi hadisədir. Bununla Azərbaycan və Türkiyə dünyaya və qonşu ölkələrə, regional dövlətlərə bir mesaj göndərir. Bir çox ölkələr arasındakı münasibətlərdən fərqli olaraq, rəsmi Bakı və Ankara sabitliyin möhkəmləndirilməsinə xidmət göstərdiklərini nümayiş etdirirlər.
Bu fikirləri AZƏRTAC-a açıqlamasında Bakı Politoloqlar Klubunun rəhbəri politoloq Zaur Məmmədov söyləyib.
Politoloq deyib: “Biz təbii ki, yaxın vaxtlarda Azərbaycanla Türkiyə arasında çox vacib sazişlərin imzalanmasının şahidi olacağıq. Eyni zamanda, sirr deyil ki, ölkələrimiz arasında bir neçə ay bundan əvvəl imzalanan və Qars müqaviləsi kimi tarixi əhəmiyyətə malik olan Şuşa Bəyannaməsi ilə Azərbaycan və Türkiyə dünyaya növbəti dəfə mesaj göndəriblər. Bəyannaməyə əsasən, əgər hansısa qüvvələr ölkəmizi təhdid edərlərsə, o zaman türk ordusunun Azərbaycanın yanında yer alacağını görəcəklər. Həmin tarixi Bəyannamədən sonra artıq növbəti dəfə Türkiyə Prezidenti Rəcəb Tayyib Ərdoğanın Füzuliyə səfəri çox ciddi strateji əhəmiyyət daşıyır, həmçinin gələcəklə bağlı rəsmi Bakı ilə Ankara arasında çox vacib amillərin, niyyətlərin olduğunun göstəricisidir. Eyni zamanda, Prezident Ərdoğanın səfər çərçivəsində bir sıra layihələrin açılışında iştirak etməsi Türkiyə və Azərbaycanın bölgə iqtisadiyyatının müxtəlif sahələrində, həmçinin investisiya qoyuluşunda bir sıra ciddi strateji əhəmiyyətli layihələrə imza atacağını göstərir. Məhz Bakı və Ankaranın prinsipial mövqeyinin nəticəsində yaxın vaxtlarda Türkiyəni Azərbaycana birləşdirən Zəngəzur dəhlizinin açılışı da gözlənilir”.
Z.Məmmədov bildirib ki, bundan başqa, hər iki ölkə Avrasiyada həm neft-qaz, həm nəqliyyat sektorlarında, həm də təhlükəsizliyin təminatında çox vacib rol oynayır. Eyni zamanda, məhz Azərbaycanla Türkiyənin başçılığı altında demək olar Avrasiyanın orta xəttində Bakı-Tbilisi-Qars sayəsində yeni marşrut işə düşüb. Zəngəzur dəhlizi sayəsində biz bu layihənin ikinci mərhələsini, davamını görəcəyik. Beləliklə, bütün geosiyasi qüvvələr Azərbaycan və Türkiyənin mövqeyi, atdığı addımlar, uğurlu iqtisadiyyat və nəqliyyat layihələri ilə sözsüz ki, hesablaşacaqlar. Beləliklə, Qarabağ və Şərqi Zəngəzurun işğaldan azad edilməsi Azərbaycan və Türkiyə, ümumilikdə Avrasiyanın orta xəttində hər kəs üçün yeni bir səhifə açdı. Biz həmin yeni səhifədə bütün tərəfləri iştiraka, təxribatlardan əl çəkməyə və gələcəyi bizimlə qurmağa dəvət edirik.
Bölmənin digər xəbərləri
