Polşa mərmi istehsalını beş dəfə artırmağı planlaşdırır
Bakı, 30 iyun, AZƏRTAC
Polşanın dövlət müdafiə konserni (PGZ) artilleriya mərmiləri istehsalını beş dəfə, yəni ildə 150-180 min ədədə qədər artırmağı planlaşdırır.
AZƏRTAC xəbər verir ki, Polşanın dövlət aktivləri naziri Yakub Yavorovski bunu “Financial Times” qəzetinə müsahibəsində deyib.
Onun sözlərinə görə, Polşa silah idxalından asılılığını azaltmaq və Rusiya təhlükəsindən qorunmaq cəhdləri fonunda haubitsa mərmilərinin istehsalını beş dəfə artıracaq.
“Qısamüddətli hədəfimiz bu növ silahların istehsalını əhəmiyyətli dərəcədə artırmaq və xarici təchizatçılardan asılılığı aradan qaldırmaqdır”, - deyə Yakub Yavorovski bildirib. Nazir mərmi çatışmazlığını Polşanın müdafiəsi üçün ən ciddi problemlərdən biri adlandırıb.
PGZ yaxın günlərdə alacağı 663 milyon dollar əlavə vəsait hesabına 155 millimetrlik haubitsa və 120 millimetrlik tank mərmiləri istehsalının artırılmasına başlayacaq. Konsern hazırda ildə 30 min iriçaplı mərmi istehsal edir və yaxın üç il ərzində onun həcmini 150-180 min ədədə çatdırmağı planlaşdırır.
Qeyd edək ki, Polşa NATO-da müdafiəyə ən çox pul xərcləyən ölkədir. Varşava 2025-ci ildə ÜDM-in 4,7 faizini hərbi ehtiyaclara ayırmaq niyyətindədir.
Bölmənin digər xəbərləri
