Premyer Liqaya vəsiqə qazanan komandanın baş məşqçisi: Çəkdiyimiz əziyyətlər boşa getmədi
Bakı, 28 aprel, AZƏRTAC
Uzun marafonda çəkdiyimiz əziyyətlər boşa getmədi. Daim komandanın yanında olan klub rəhbərliyinə və azarkeşlərimizə təşəkkür edirəm.
Bu sözləri AZƏRTAC-a açıqlamasında növbəti mövsüm Azərbaycan Premyer Liqasında mübarizə aparacaq "Karvan" komandasının baş məşqçisi Kənan Kərimov deyib.
O, qazandıqları nəticəyə görə futbolçuları ilə qürur duyduğunu bildirib: "Çətinliklərdən üzüağ çıxmağı bacardıq. Premyer Liqaya vəsiqə qazandıq, bu hissləri sözlə ifadə etmək çətindir. Bilirsiniz ki, 16 ildən sonra Yevlax yenidən elitada təmsil olunacaq. Bundan sonra da bizi böyük işlər gözləyir. Çünki I Liqa ilə Premyer Liqa arasında böyük fərq var. Növbəti il "Karvan"ın adına yaraşan tərzdə mübarizə aparmaq istəyirik".
Mütəxəssis Premyer Liqaya vəsiqəni təmin etmələrinə baxmayaraq, qarşıdakı dörd turda da uğurlu nəticə hədəflədiklərini söyləyib: "İkinci yerdə olan "İmişli" ilə 1 xal fərqimiz var. İstəyirik ki, I Liqanı 2-ci yerdə bitirək. Bunun üçün əlimizdən gələni edəcəyik".
Azərbaycan millisinin sabiq hücumçusu bildirib ki, növbəti mövsüm üçün heyətin necə formalaşdırılacağı barədə indidən danışmaq tezdir: "Hansısa futbolçunun komandadan gedəcəyi və ya bizimlə qalacağı ilə bağlı nəsə demək düzgün olmaz. Qarşıda dörd tur var. Uşaqların psixologiyasını pozmaq istəmirəm. Hər şey mövsümün sonunda müəyyənləşəcək".
Qeyd edək ki, "Karvan" komandası hazırda I Liqada 43 xalla 3-cü pillədə qərarlaşıb.
Bölmənin digər xəbərləri
