Prezident İlham Əliyev öz çıxışı ilə ŞƏT gündəliyinə yeni məzmun gətirdi - RƏY
Bakı, 3 sentyabr, AZƏRTAC
Şanxay Əməkdaşlıq Təşkilatı (ŞƏT) dünya əhalisinin təxminən 40 faizini, dünya ÜDM-in isə 25 faizini əhatə edir. Belə geniş coğrafiya, insan resursları və iqtisadi potensial ŞƏT-i siyasi, iqtisadi, enerji və nəqliyyat imkanlarına görə dünyanın ən mühüm platformalarından birinə çevirir.
Bu fikirləri AZƏRTAC-a açıqlamasında Mətbuat Şurasının İdarə Heyətinin üzvü Müşfiq Ələsgərli söyləyib.
O bildirib ki, ŞƏT üzv dövlətlər üçün ticarət, investisiya, enerji, nəqliyyat-kommunikasiya, rəqəmsal inkişaf, mədəniyyət və humanitar əlaqələrlə yanaşı, təhlükəsizlik və terrorizmə qarşı birgə mübarizə imkanları da yaradır. O baxımdan Azərbaycanın bu platformadakı iştirakı xüsusi əhəmiyyət daşıyır. Ölkəmiz 2015-ci ildən ŞƏT-in dialoq tərəfdaşıdır. Bu status Azərbaycana ŞƏT-in siyasi və iqtisadi gündəliyində iştirak etmək, üzv dövlətlərlə birbaşa təmasları genişləndirmək və öz regional təşəbbüslərini təqdim etmək imkanı verir.
Prezident İlham Əliyevin ŞƏT-in yüksəksəviyyəli tədbirlərində iştirakı Azərbaycana bu platforma vasitəsilə Avrasiyanın aparıcı dövlətləri ilə münasibətlərini möhkəmləndirmək, özünü Şərqlə Qərb arasında mühüm bağlantı nöqtəsi kimi təqdim etmək imkanı yaradır. Xüsusilə Şərq-Qərb və Şimal-Cənub nəqliyyat dəhlizləri, enerji və ticarət əlaqələri baxımından bu platformanın Azərbaycan üçün ciddi potensialı vardır.
"ŞƏT-in Bişkekdə keçirilən 26-cı sammiti çərçivəsində Azərbaycanın dövlət başçısının Ermənistanın Baş naziri Nikol Paşinyan, Qazaxıstan Prezidenti Kasım-Jomart Tokayev, İran Prezidenti Məsud Pezeşkian və Türkiyə Prezidenti Rəcəb Tayyib Ərdoğanla ikitərəfli görüşləri xüsusi diqqət çəkdi. Görüşlərdə ikitərəfli münasibətlər, regional sülh və təhlükəsizlik, nəqliyyat-logistika əlaqələri, qarşılıqlı maraq doğuran digər məsələləri müzakirə edildi. Bu görüşlər Azərbaycanın eyni platformada həm qonşu ölkələrlə, həm də Avrasiyanın müxtəlif siyasi və iqtisadi mərkəzləri ilə paralel dialoq aparmaq imkanlarını nümayiş etdirdi.
Prezident İlham Əliyevin “ŞƏT plyus” formatındakı çıxışı isə sammitin Azərbaycan baxımından siyasi məzmununu daha da genişləndirdi. Dövlətimizin başçısı, ilk növbədə, Cənubi Qafqazda formalaşmış yeni reallıqları diqqətə çatdırdı. Azərbaycan və Ermənistan arasında sülh sazişinin mətninin paraflanmasından sonra 30 illik münaqişənin başa çatdığını, regionun sülh zonasına çevrildiyini bildirdi. Azərbaycanın Ermənistana neft məhsulları tədarük etməsi, üçüncü ölkələrin yüklərinin tranzitini təmin etməsi, iki ölkə arasında ticarət əlaqələrinin qurulması və yeni nəqliyyat kommunikasiyalarının yaradılması istiqamətində görülən işlər yeni reallığın praktiki nəticələri kimi təqdim edildi. Bununla Azərbaycan ŞƏT məkanına Cənubi Qafqazın əməkdaşlıq və bağlantılar regionuna çevrildiyi mesajını verdi", - deyə M.Ələsgərli vurğulayıb.
O, çıxışın digər mühüm məqamının beynəlxalq təşkilatların münaqişələrin həllində rolu ilə bağlı olduğunu diqqətə çatdırıb: "Prezident İlham Əliyev BMT Təhlükəsizlik Şurasının 1993-cü ildə qəbul etdiyi dörd qətnamənin yalnız 30 il sonra icra edildiyini və bu prosesdə BMT-nin real rolunun olmadığını xatırlatdı. Bu nümunə əsasında Təhlükəsizlik Şurasının qətnamələrinin daha qısa müddətdə icrasını təmin edəcək mexanizmlərin yaradılmasının vacibliyini vurğuladı.
Bütün bunları nəzərə alaraq deyə bilərik ki, Prezident İlham Əliyev ŞƏT sammitindəki çıxışı ilə beynəlxalq münasibətlər sisteminin daha səmərəli və ədalətli fəaliyyət göstərməsi ilə bağlı Azərbaycanın mövqeyini ortaya qoydu. Bu baxımdan Bişkek sammiti Azərbaycan üçün həm siyasi dialoqu genişləndirmək, həm regional sülh və nəqliyyat bağlantılarını təşviq etmək, həm də ölkənin Avrasiyanın müxtəlif güc mərkəzləri arasında mühüm əlaqələndirici mövqeyini möhkəmləndirmək baxımından əhəmiyyətli oldu".
Bölmənin digər xəbərləri
