Prezident İlham Əliyevin diplomatiyasının uğurlu nəticəsi ŞƏRH
Bakı, 19 sentyabr, AZƏRTAC
Sentyabrın 16-da Şuşada baş tutan Azərbaycan Prezidenti İlham Əliyevlə Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyanın görüşü region və dünya siyasəti baxımından tarixi hadisə kimi dəyərləndirilə bilər. Bu görüş, sadəcə, iki dövlət arasında münasibətlərin möhkəmlənməsi deyil, həm də Azərbaycanın beynəlxalq nüfuzunun və Prezident İlham Əliyevin liderlik keyfiyyətlərinin dünyada yüksək qiymətləndirilməsinin bariz göstəricisidir. BƏƏ Prezidentinin azad olunmuş Qarabağın mərkəzi - Şuşaya səfəri, ilk növbədə, Azərbaycanın haqq işinə verilən böyük dəstəkdir. Otuzillik işğaldan sonra Prezident İlham Əliyevin siyasi iradəsi, qətiyyətli rəhbərliyi və diplomatik ustalığı nəticəsində bərpa olunan tarixi ədalət artıq dünyanın ən nüfuzlu liderləri tərəfindən qəbul və təqdir olunur. Şuşada keçirilən görüş Azərbaycanın həm hərbi-siyasi gücünü, həm də beynəlxalq etimad ünvanına çevrilməsini nümayiş etdirdi.
Bu sözləri AZƏRTAC-a açıqlamasında beynəlxalq hüquq üzrə ekspert Kəramət Qənbərov söyləyib.
O bildirib ki, Prezident İlham Əliyev təkcə Azərbaycanın deyil, bütövlükdə regionun inkişafı və təhlükəsizliyi naminə mühüm addımlar atır.
Onun liderliyi nəticəsində:
-Azərbaycan beynəlxalq təşkilatlarda söz sahibi dövlətə çevrilmişdir;
-Enerji diplomatiyası sayəsində ölkəmiz Avropanın enerji təhlükəsizliyində əsas tərəfdaş rolunu qazanmışdır;
-Qarabağın bərpası və reinteqrasiyası üzrə genişmiqyaslı layihələr həyata keçirilir;
-Regional əməkdaşlıq və sülh təşəbbüsləri dünya miqyasında yüksək qiymətləndirilir.
Məhz bu xidmətlərinə görə dövlətimizin başçısı beynəlxalq siyasi dairələrdə “regionun güclü lideri”, “qlobal enerji strategiyasının memarı” və “ədalətli sülhün tərəfdarı” kimi tanınır. Dünyanın aparıcı dövlətlərinin başçıları onun uzaqgörən siyasətini yüksək dəyərləndirir, Azərbaycanın seçdiyi inkişaf yoluna hörmətlə yanaşırlar. Şuşada imzalanmış “Hərtərəfli Strateji Tərəfdaşlıq haqqında Birgə Bəyannamə” Prezident İlham Əliyevin uzaqgörən xarici siyasət kursunun məntiqi nəticəsidir. Bu sənəd Azərbaycanla BƏƏ arasında münasibətləri ən yüksək səviyyəyə qaldırmaqla yanaşı, ölkəmizin beynəlxalq siyasi nüfuzunu daha da gücləndirir. Xüsusilə bərpaolunan enerji sahəsində əməkdaşlıq Azərbaycanın yaşıl gündəminin uğurlu həyata keçirilməsinin nümunəsidir. “Masdar” şirkətinin Azərbaycana böyük sərmayələr yatırması, süni intellekt və rəqəmsal texnologiyalar sahəsində əməkdaşlıq isə ölkəmizin müasir çağırışlara adekvat cavab verən, innovativ inkişaf yolunu seçmiş dövlət olduğunu bir daha göstərir.
“Prezident İlham Əliyevin fəaliyyəti beynəlxalq siyasi dairələrdə nümunəvi liderlik kimi qiymətləndirilir. Onun Qarabağ məsələsində sərgilədiyi prinsipial mövqe, sülh prosesinə verdiyi töhfələr, enerji təhlükəsizliyi sahəsində yaratdığı yeni reallıqlar və qlobal çağırışlara verdiyi cavablar Azərbaycanı dünya siyasi xəritəsində etibarlı tərəfdaş mövqeyinə gətirib. BƏƏ Prezidentinin Şuşada səsləndirdiyi fikirlər də bunu təsdiqləyir. O, Azərbaycanla əməkdaşlığın bütün sahələrdə genişlənməsinə maraq göstərməklə yanaşı, ölkəmizin regionda sülhün və sabitliyin təmin olunmasındakı rolunu da açıq şəkildə qeyd etdi. Bu, Azərbaycan Prezidentinin liderliyinə, onun beynəlxalq siyasətdə tutduğu mövqeyə verilən yüksək qiymətin ifadəsidir”, - deyə K.Qənbərov deyib.
Ekspertin sözlərinə görə, Şuşada baş tutan tarixi görüş və imzalanan sənədlər göstərir ki, Prezident İlham Əliyevin rəhbərliyi ilə Azərbaycan yeni bir inkişaf mərhələsinə qədəm qoyur. Bu mərhələ təkcə ölkəmizin iqtisadi gücünü deyil, həm də beynəlxalq nüfuzunu daha da möhkəmləndirir. Dövlətimizin başçısının xidmətləri, siyasi iradəsi və liderlik keyfiyyətləri artıq təkcə Azərbaycan xalqı tərəfindən deyil, bütün dünya tərəfindən də yüksək qiymətləndirilir. Onun adı bu gün ədalətli siyasətin, güclü iradənin, strateji düşüncənin və müasir dövlətçilik nümunəsinin sinoniminə çevrilib. Şuşada atılan addımlar isə həm Azərbaycanın, həm də regionun gələcəyi üçün əbədi yol xəritəsi olaraq qalacaq.
Bölmənin digər xəbərləri
