Martın 4-də Xanlar rayonunda Qarabağ müharibəsi əlilləri və şəhid ailələri üçün 16 mənzilli yaşayış binası istifadəyə verilmişdir. Azərbaycan Prezidenti İlham Əliyev bu münasibətlə keçirilən mərasimdə iştirak etmişdir.

Dövlət başçısının tapşırığı ilə tikilmiş ikimərtəbəli, dörd bloklu binada 8 ikiotaqlı, 8 üçotaqlı mənzil vardır.

Prezident İlham Əliyev mənzillərin orderlərini sahiblərinə təqdim etdi.

Şəhid ailəsinin üzvü, hərbçi ESMİRAL İSMAYILOVA dövlətimizin başçısına təşəkkür edərək dedi:

- Cənab Prezident, Sizi buradakı Qarabağ müharibəsi əlilləri və şəhid ailələri adından salamlayıram. 1988-ci ildən 1994-cü ilə qədər Azərbaycan çox ağrılı, acılı günlərini yaşadı. Bu, bizim də həyatımızdan yan keçmədi. Mənim həyat yoldaşım İsmayıl Zəlimxan oğlu İsmayılov Qarabağ uğrunda gedən döyüşlərdə şəhid oldu. Hazırda mənim iki övladım var. Onlardan biri Azərbaycan ordusunun hava hücumundan müdafiə qüvvələrində xidmət edir. Mən özüm də hərbçiyəm. 15 ildir Azərbaycan Respublikasının Silahlı Qüvvələrində xidmət edirəm və öz şərəfli peşəmdən qürur duyuram.

Cənab Prezident, Sizin hərtərəfli qayğınızla əhatə olunmuşuq. Ona görə də şəhid ailəsi olmağımızı nə uşaqlarım, nə də mən hiss etməmişik. Sizə dərin minnətdarlığımızı bildiririk. Siz çıxışlarınızda tez-tez vurğulayırsınız ki, Azərbaycan nəyin bahasına olursa-olsun torpaqlarını erməni işğalçılarından azad edəcəkdir. Bəli, indi bizim güclü, nizami ordumuz var. Biz ümidvarıq ki, torpaqlarımız erməni işğalçılarından azad olunacaq və o gün uzaqda deyildir. Bizim ordumuz, Silahlı Qüvvələrimiz Azərbaycanın ərazi bütövlüyünü, suverenliyini, müstəqilliyini qorumağa qadirdir. Belə güclü ordumuz olduğuna, həmişə hərbçilərə kömək etdiyinizə görə Sizə hərbçilər adından minnətdarlığımı bildirirəm. Bizə göstərdiyiniz diqqətə görə bütün şəhid ailələri və Qarabağ müharibəsi əlilləri adından Sizə dərin minnətdarlığımı bildirirəm. Allah Sizi üstümüzdən əskik etməsin. Ümidimiz, güman yerimiz, iman yerimiz Sizsiniz. Bizim yeganə Prezidentimiz sizsiniz. Cənab Prezident, Sizin alternativiniz yoxdur. Sağ olun.

Prezident İLHAM ƏLİYEV təşəkkür edərək dedi:

-Çox sağ olun. Sizi ürəkdən salamlayıram.

Siz qeyd etdiyiniz kimi, ordu quruculuğuna çox böyük diqqət göstərilir. Ordumuz güclənir, möhkəmlənir. Biz hərbçilərin sosial məsələlərinin həlli üçün də çalışırıq. Əlbəttə, indiki Azərbaycan ordusu bölgədə, Cənubi Qafqazda ən güclü ordudur. Biz buna böyük dərəcədə maddi-texniki bazanın möhkəmləndirilməsi və peşəkarlığın artırılması sayəsində nail ola bilmişik. Ancaq bu proses hələ davam edəcək və davam etməlidir. Biz müharibə şəraitində yaşayırıq, torpaqlarımız işğal altındadır. Ona görə təbiidir ki, biz, ilk növbədə, ordu quruculuğu ilə məşğul olmalıyıq. Azərbaycanın dövlət büdcəsində orduya ayrılan xərclər birinci yerdədir. Bu, belə də olmalıdır və ildən-ilə daha da artırılacaqdır. Ordumuz qarşıda duran bütün vəzifələri həll etməyə hazırdır.

Biz istəyirik ki, münaqişəni sülh yolu ilə həll edək. Biz istəmirik ki, müharibə olsun. Müharibə nə olduğunu siz hamıdan yaxşı bilirsiniz. Siz Vətən uğrunda, doğma ölkəmizin müstəqilliyi uğrunda yaxınlarınızı itirmisiniz, sağlamlığınızı itirmisiniz. Azərbaycanın müstəqilliyini qazanması da o ərəfəyə düşübdür. Hələ müstəqillik əldə etməzdən əvvəl biz münaqişədə idik və bizə qarşı təcavüz başlamışdı. İndi hamımız yaxşı xatırlayırıq, müstəqilliyimizin ilk illəri çox ağır keçibdir. Demək olar ki, Azərbaycanda o vaxt peşəkar, mütəşəkkil ordu yox idi, sadəcə olaraq, könüllülər, vətənpərvər insanlar doğma torpaqları müdafiə etmək üçün döyüşə göndərilmişdilər və müxtəlif amillərə görə Azərbaycan torpaqları işğal altına düşdü. Əlbəttə, Azərbaycanın o vaxtkı rəhbərliyinin bu işlərdə birbaşa günahları var. Beynəlxalq vəziyyət də başqa cür idi. Azərbaycan da zəif bir ölkə idi. Müstəqillik əldə edəndə bizim, demək olar ki, iqtisadi gücümüz yox idi, siyasi gücümüz yox idi. Azərbaycana o vaxt rəhbərlik edən insanlar Azərbaycan xalqının taleyini düşünmürdülər, özlərini düşünürdülər, başqa ölkələrin təsiri altında idilər. Müstəqil siyasət aparmaq iqtidarında deyildilər. Milləti, dövləti, xalqı yox, öz gələcəyini, öz rahatlığını düşünürdülər. Bu, 1991-ci ildə də belə idi. 1992-ci ildə də belə idi və 1993-cü ilin iyun ayına qədər də belə idi. Siz yaxşı bilirsiniz ki, bundan sonra, ulu öndər Heydər Əliyev rəhbərliyə gələndən sonra çox uğurlu hərbi əməliyyatlar aparılmış, torpaqlarımızın bir hissəsi qaytarılmışdır. Ancaq o vaxt Azərbaycanın hərbi gücü və iqtisadi gücü imkan vermirdi ki, müharibə davam etsin. Bu, reallıq idi. O vaxt müharibə dayanmalı idi ki, biz güc toplayaq, möhkəmlənək, güclənək və daha da güclü mövqedən çıxış edək. Elə də oldu. 1993-2003-cü illər inkişaf illəri oldu. Bu il, 2008-ci ildə biz artıq orduya 1 milyard 300 milyon dollar pul xərcləyirik. Gələcək illərdə daha da çox olacaqdır. Texnika, təyyarələr, silah-sursat alırıq, nə lazımdır edirik ki, torpaqlarımızı hərb yolu ilə azad edilməsinə hər an hazır olaq və biz də buna hazırıq. Sadəcə olaraq, danışıqlar prosesində müəyyən ümidlər olduğuna görə, biz hələ ki, bu prosesə sadiqik və çalışacağıq ki, bunu sülh yolu ilə həll edək. Ancaq bunu sülh yolu ilə o vaxt həll etmək mümkündür ki, biz güclü orduya malik olaq. Düşmən biləndə ki, - əslində, bilir, - Azərbaycan ordusu güclüdür, o vaxt danışıqlar prosesində də, necə deyərlər, özünü normal çərçivəyə sığışdıracaqdır.

Bu münaqişə Azərbaycanın ərazi bütövlüyü çərçivəsində həll olunmalıdır. Bütün dünya birliyi bunu dəstəkləyir, beynəlxalq hüquq normaları bunu diktə edir. Beynəxalq hüquq normaları da hər bir ölkə üçün mütləq həqiqət olmalıdır. Baxmayaraq, Ermənistan hələ ki, bu normalara məhəl qoymur, amma vaxt gələcək, reallıqla və beynəlxalq hüquqla razılaşmalı olacaqdır. Ancaq yenə də deyirəm, istədiyimizə nail olmaq üçün, ədaləti bərpa etmək üçün təkcə danışıqlar kifayət deyildir. Bizim danışıqlara hazır olmağımız kifayət deyil, diplomatik səylər kifayət deyildir. Güc olmalıdır. Siz görürsünüz, dünyada nələr baş verir. Güc olan yerdə hər şey həll olunur. Əfsuslar olsun ki, bu, belədir. Biz bunu arzulamırdıq ki, bəzi hallarda dünyada beynəlxalq normalar pozulur, ədalətsiz qərarlar qəbul edilir. Əslində, bu qərarlar dünya nizamına da təsir göstərir. Ancaq güc həlledici amildir. Biz də bu gücü toplayırıq və toplayacağıq. Azərbaycanın inkişafı, iqtisadi islahatlar - bütün görülən işlər bu məqsədi güdür.

Mən sizə cansağlığı arzulayıram. Arzu edirəm ki, bu evdə yaxşı şəraitdə yaşayasınız. Siz buna layiqsiniz. Yenə də deyirəm, doğmalarınızı, sağlamlığınızı itirmisiniz. Əgər Azərbaycan dövləti sizin həyatınızı bir balaca yüngülləşdiribsə, mən hesab edirəm ki, bu, yaxşı haldır. Azərbaycan dövləti ona sədaqətlə xidmət etmiş insanlara qayğı göstərməyi davam etdirəcəkdir.

Bilirsiniz ki, sosial müavinətlər də artırılır və artırılacaqdır. Sizin sosial məsələləriniz həllini tapacaqdır. Xanlar rayonunda sizin kimi insanlar var, çoxdur. Hələ ki, 16 mənzil tikilib istifadəyə verilibdir. Gələcəkdə yeni evlər tikiləcək ki, sizin kimi insanların vəziyyətini yaxşılaşdıraq.

X X X

Sonra Prezident İlham Əliyev mənzillərlə tanış oldu. Dövlət başçısının adından hər bir mənzilə soyuducu və televizor hədiyyə olunmuşdur. Mənzillərdə yaşayış üçün hər cür şərait yaradılıb, mebel dəstləri qoyulub, bina istilik sistemi ilə, qazla təchiz edilibdir. Yaxın vaxtlarda telefon xətləri də çəkiləcəkdir.

######