Qarabağ Universitetinin yataqxanasının rəqəmsal platforması yaradılıb
Bakı, 24 sentyabr, AZƏRTAC
Gənclər Fondunun “Rəqəmsal” mövzulu qrant müsabiqəsi çərçivəsində “SmartYurd – veb-saytının yaradılması” adlı layihə uğurla həyata keçirilib. Layihə nəticəsində Qarabağ Universiteti tələbələri üçün yataqxana həyatını rəqəmsallaşdıran “SmartYurd” (smartyurd.az) platforması istifadəyə verilib.
Universitetdən AZƏRTAC-a bildirilib ki, “SmartYurd” Qarabağ Universitetinin tələbələri üçün xüsusi olaraq hazırlanmış müasir rəqəmsal yataqxana idarəetmə sistemidir. Veb-saytın əsas məqsədi yataqxana ilə bağlı prosesləri optimallaşdırmaq, tələbələr üçün daha rahat, şəffaf və səmərəli bir mühit yaratmaqdır.
“SmartYurd” layihəsi, tələbələrin gündəlik həyatını asanlaşdırmaqla yanaşı, idarəetmədə çevikliyin və səmərəliliyin artırılmasına da mühüm töhfə verəcək. Bu yenilikçi platforma tələbə məmnuniyyətini artırmaq və onlara müasir standartlara uyğun yaşayış təcrübəsi təqdim etmək istiqamətində atılmış mühüm bir addımdır.
Layihənin rəhbəri Qarabağ Universitetinin Keyfiyyətin təminatı və strateji inkişaf şöbəsinin müdiri Heydər Rzayev, layihənin koordinatoru isə Qarabağ Universitetinin Mühəndislik fakültəsinin ikinci kurs tələbəsi Fərid Fətullayevdir.
Bölmənin digər xəbərləri
