“Qarabağ”ın legioneri: Milli komandanın formasını geyinmək fərdi uğurlardan daha önəmlidir
Bakı, 26 fevral, AZƏRTAC
Karyeramla bağlı ən böyük arzum Qana millisində çıxış etməkdir.
AZƏRTAC xəbər verir ki, bu sözləri “Qarabağ”ın qanalı yarımmüdafiəçisi Emmanuel Addai ölkəsinin mətbuatına açıqlamasında deyib.
Futbolçu bildirib ki, yığmanın formasını geyinmək onun üçün ölkə xaricində qazanılan fərdi uğurlardan daha önəmlidir: “Qananı təmsil etmək istəyirəm, çünki ölkəmi çox sevirəm. Uşaqlıqdan bu yığmanın finallarda məğlub olduğunu görmüşəm. Xalqımıza sevinc yaşatmaq istəyirəm. Arzum budur ki, təkcə xaricdə oynayan futbolçu kimi yox, Qana üçün əhəmiyyətli iş görən biri kimi xatırlanım. Məqsədim yalnız Avropada uğurlu klub karyerası qurmaq deyil, həm də Qana millisinin heyətində beynəlxalq arenada nailiyyət qazanmaqdır”.
24 yaşlı oyunçu hələlik Qana yığmasından rəsmi təklif almadığını deyib: “Hələ mənimlə əlaqə saxlanılmayıb. Amma düşünürəm ki, “Qarabağ”dakı çıxışlarımı izləyirlər. Hər şeyin öz zamanı var. Buna görə də tələsmirəm”.
Bölmənin digər xəbərləri
