Qazaxıstan və Çin avtomobil daşımalarına icazələrin verilməsində limitsiz sistemə keçid barədə razılığa gəliblər
Astana, 7 noyabr, AZƏRTAC
“Xorqos” Beynəlxalq Sərhədyanı Əməkdaşlıq Mərkəzində Qazaxıstan və Çinin Nəqliyyat nazirliklərinin nümayəndələri beynəlxalq avtomobil daşımaları məsələlərinə həsr olunmuş görüş keçiriblər.
AZƏRTAC Qazaxıstan Nəqliyyat Nazirliyinə istinadla xəbər verir ki, danışıqların yekunlarına dair tərəflər bu razılaşmalara nail olublar: 6–12 noyabr tarixləri arasında Çin tərəfi Qazaxıstana 15 min ədəd icazə blankı təqdim edəcək. Yeddigünlük müddətin nəticələrinə əsasən, Qazaxıstan daşıyıcılarının səfərlərə olan faktiki orta sutkalıq tələbatı müəyyənləşdiriləcək. Əldə olunan məlumatlara əsaslanaraq, bundan sonra icazə blanklarının gündəlik ötürülməsi həyata keçiriləcək.
2026-cı ildən etibarən icazə blanklarının say məhdudiyyəti müəyyən edilmədən limitsiz şəkildə verilməsi sisteminə keçid planlaşdırılır. Beləliklə, əgər daha əvvəl Çin qanunvericiliyinin pozulması faktı qeydə alınmayıbsa, elektron növbə sistemi üzrə Çin Xalq Respublikasına daxil olan bütün nəqliyyat vasitələrinə avtomatik şəkildə icazə blankları təyin ediləcək.
Qeyd olunur ki, 2024-cü il ərzində Qazaxıstan daşıyıcıları tərəfindən 228 min icazə blankından istifadə edilib. Cari ilin əvvəlindən isə Çindən artıq 230 mindən çox icazə blankı alınıb və istifadə olunub.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
