Qazaxıstanda əməyin mühafizəsi sahəsində yeni modelə keçid müzakirə olunub
Bakı, 5 iyun, AZƏRTAC
Beynəlxalq Əmək Təşkilatının (BƏT) “Qazaxıstanda mədən sektorunda sosial dialoq vasitəsilə əməyin mühafizəsinin təşviqi” layihəsi çərçivəsində “Risk qiymətləndirmə metodologiyasının təkmilləşdirilməsi üçün təkliflərin hazırlanması” mövzusunda üçtərəfli seminar keçirilib.Tədbir Qazaxıstan Respublikası Əmək və Əhalinin Sosial Müdafiəsi Nazirliyinin Əməyin Mühafizəsi üzrə Respublika Elmi-Tədqiqat İnstitutunun ev sahibliyi ilə təşkil edilib. Seminarda “Qazaxıstanda kompensasiya modelindən riskə əsaslanan yanaşmaya və sosial müdafiənin yeni modelinə keçid mexanizmləri” müzakirə olunub.
Bu barədə AZƏRTAC-a Dövlət Əmək Müfəttişliyi Xidmətinin mətbuat xidmətindən məlumat verilib.
Bildirilib ki, seminarda Azərbaycan Respublikasının Əmək və Əhalinin Sosial Müdafiəsi Nazirliyinin, nazirlik yanında Dövlət Əmək Müfəttişliyi Xidmətinin və xidmətin tabeliyindəki Əməyin Mühafizəsi Mərkəzinin nümayəndələri, Qazaxıstan Respublikasının Əmək və Əhalinin Sosial Müdafiəsi Nazirliyinin nümayəndələri, BƏT-in Qazaxıstandakı milli koordinatoru Daulet Arğandıqov, əmək mühafizəsi üzrə beynəlxalq ekspert Yekaterina Kuznetsova və digər mütəxəssislər iştirak ediblər.
İki gün davam edən seminar çərçivəsində əməyin mühafizəsi sahəsində yeni yanaşmalar müzakirə olunub.
Seminarın ilk günündə mövcud sistemin təhlili aparılıb. İstehsalat obyektlərinin attestasiya olunması, kompensasiyalar və peşə siyahılarına baxış keçirilib. Yeni sistemin əsas prinsipləri təqdim olunaraq peşə risklərinin inteqral və fərdi qiymətləndirilməsi, işəgötürənlərin stimullaşdırılması yolları, keçid zamanı işçilərin hüquqlarının qorunması və yeni keçid modeli üzrə təkliflər müzakirə olunub.
Bundan əlavə, Azərbaycan nümayəndə heyətinin “Əmək Resurslarının İnkişafı Mərkəzi” ASC-nin nümayəndələri ilə görüşü olub. Görüşdə Əməyin Mühafizəsi Mərkəzinin fəaliyyət istiqamətləri və əməyin mühafizəsi sahəsində görülən işlər barədə məlumat verilib. Müəssisələrdə əməyin mühafizəsi üzrə standart, norma və qaydaların tətbiqinə göstərilən dəstək vurğulanıb və yeni qəbul edilmiş standartlarla bağlı iştirakçılar məlumatlandırılıb.
Həmçinin əmək risklərinin rəqəmsal xəritəsi barədə məlumat verilib və əmək münaqişələrinin profilaktikası üçün alət kimi skorinq modelləri nümayiş olunub. Görüşdə iştirakçılar arasında sual-cavab sessiyası təşkil edilib, gələcək əməkdaşlıq və təcrübə mübadiləsi üzrə fikir mübadiləsi aparılıb.
Seminarın ikinci günü peşə risklərinin qiymətləndirilməsi metodikasının layihəsi üzərində geniş iş aparılıb. Risklərin fərdi və ümumi qiymətləndirilməsi metodları müqayisə edilərək yeni təkmilləşdirilmiş metodika üzrə təkliflər paketi hazırlanıb və Milli Fəaliyyət Planının əsas istiqamətləri müəyyənləşdirilib.
Seminar çərçivəsində Qazaxıstan və digər iştirakçı ölkələr arasında əməyin mühafizəsi sahəsində qarşılıqlı əməkdaşlığın gücləndirilməsi və davamlı görüşlərin keçirilməsi barədə razılıq əldə olunub.
Qeyd edək ki, seminardan sonra Azərbaycan nümayəndə heyətinin Qazaxıstanın Əmək və Əhalinin Sosial Müdafiəsi Nazirliyinin Əməyin Mühafizəsi üzrə Respublika Elmi-Tədqiqat İnstitutunun baş direktoru Ləzzət Meyraşevna Aktaeva və əməkdaşları ilə də görüşü olub. Görüş zamanı qarşılıqlı təcrübə mübadiləsi ilə bağlı müzakirələr aparılıb, nümayəndə heyəti İnstitutun fəaliyyəti barədə məlumatlandırılıb.
Bölmənin digər xəbərləri
