Qazaxıstanda ölüm hökmü ləğv edilib
Nur-Sultan, 24 sentyabr, AZƏRTAC
Qazaxıstanın BMT yanında daimi nümayəndəsi Kayrat Umarov təşkilatın mənzil-qərargahında faktiki olaraq ölüm hökmünü ləğv edən ikinci fakültativ protokolu imzalayıb.
AZƏRTAC xəbər verir ki, Qazaxıstanın ölüm cəzasının ləğvinə dair beynəlxalq protokola qoşulacağını elə həmin gün Prezident Kasım-Jomart Tokayev BMT Baş Assambleyasının 75-ci Sessiyasının ümumi siyasi müzakirələrində çıxış edərkən bildirib.
Ötən ilin dekabrında Prezident Tokayev Qazaxıstan XİN-ə ölüm hökmünün ləğvi ilə bağlı sənədin ikinci fakültativ protokoluna qoşulmağa başlamağı tapşırmışdı.
XİN-in məlumatına görə, bu beynəlxalq sənədin imzalanması ölüm cəzasının əhatə dairəsinin tədricən daralmasına və cinayət qanunvericiliyinin humanistləşdirilməsinə yönəlmiş kursun davamıdır.
Məlumatda, həmçinin qeyd edilib ki, 2003-cü ildə ölkədə ölüm cəzasının tətbiqinə moratorium qoyulmuşdu.
İlahə Əhmədova
AZƏRTAC-ın xüsusi müxbiri
Nur-Sultan
Bölmənin digər xəbərləri
