QAZAXISTANIN AKTAU ŞƏHƏRİNDƏ “XƏZƏR-DOSTLUQ DƏNİZİDİR” ADLI BEYNƏLXALQ FESTİVAL OLMUŞDUR
Festivalda Azərbaycan, Qazaxıstan, Rusiya, İran və Türkmənistandan gəlmiş alimlər, biznesmenlər, siyasətçilər, rəssamlar və müğənnilər iştirak etmişlər. Ölkəmizi bu tədbirdə Azərbaycanın Qazaxıstandakı səfiri Lətif Qəndilovun rəhbərliyi ilə 35 nəfərlik nümayəndə heyəti təmsil etmişdir.
Beynəlxalq festivalın açılışında Qazaxıstanın dövlət katibi Oralbay Abdlkarimov Xəzər dənizinin problemlərindən, Xəzərin hüquqi statusunun müəyyən olunmasından, dənizin ekologiyası və ehtiyatlarının qorunmasından danışaraq bildirmişdir ki, Xəzər dənizi Şərqlə Qərb, Şimalla Cənub, islamla xristianlıq arasında körpü, sülh və sabitlik amili ola bilər.
Festival çərçivəsində Xəzər humanitar forumu da keçirilmiş, burada mədəniyyətlərin dialoqu, dünya iqtisadi siyasətində Xəzər regionunun yeri və rolu, regionda geosiyasi və energetika problemlərinin həlli, postsovet məkanında mədəni inkişafın dərinləşdirilməsi və digər məsələlər müzakirə edilmişdir.
Tədbirlərdə Azərbaycanın Qazaxıstandakı səfiri Lətif Qəndilov çıxış etmiş, Azərbaycan ilə Qazaxıstan və digər Xəzəryanı ölkələr arasında əməkdaşlığın daha da dərinləşdirilməsi vacibliyinə toxunmuşdur.
Festival çərçivəsində keçirilən Xəzər iqtisadi sərgisində isə bu ölkələrdən gəlmiş 50-dən artıq şirkət və firma iştirak etmişdir. Azərbaycandan gəlmiş rəssamlar təsviri sənət sərgisində əl işlərini nümayiş etdirmiş, müğənnilər Azərbaycan xalq mahnıları və təsniflərimizi oxumuşlar.
Tədbir çərçivəsində Lətif Qəndilov Qazaxıstanın dövlət katibi Oralbay Abdlkarimov və Məngistay vilayətinin hakimi Krımbek Kuşerbayev ilə görüşmüş, ölkələrimiz arasında neft-qaz, nəqliyyat, tikinti, kənd təsərrüfatı və digər sahələrdə əməkdaşlığın inkişafı məsələlərini müzakirə etmişlər.
Bölmənin digər xəbərləri
