Qazaxıstanın səfiri: Hökumətlərarası komissiyanın növbəti iclası ilin ikinci yarısında keçiriləcək
Bakı, 4 aprel, AZƏRTAC
Qazaxıstan və Azərbaycan arasında ticarət-iqtisadi əməkdaşlıq üzrə birgə hökumətlərarası komissiyasının növbəti iclası cari ilin ikinci yarısında Bakıda keçiriləcək.
Bunu AZƏRTAC-a müsahibəsində Qazaxıstanın Azərbaycandakı səfiri Beybit İsabayev bildirib. Komissiyanın ticari əlaqələrin inkişafında və dövlətlərarası və hökumətlərarası səviyyədə sazişlərin həyata keçirilməsində mühüm rolunu vurğulayan diplomat əlavə edib ki, onun 2017-ci ilin dekabrında Bakıda keçirilmiş 14-cü iclasında ikitərəfli iqtisadi əlaqələrin tarixində ilk dəfə olaraq 2018-2020-ci illər üçün “Yol xəritəsi” qəbul edilib. Bu sənəddə, hər şeydən əvvəl, iki ölkənin liderlərinin qarşıya qoyduqları vəzifələrin həyata keçirilməsi və ümumilikdə, ikitərəfli ixrac-idxal əməliyyatlarının potensialının genişləndirilməsi nəzərdə tutulur.
Səfir deyib: “Komissiyanın ötən ilin oktyabrında Nur-Sultanda keçirilmiş 15-ci iclasında tərəflər 2017-ci ildə qəbul olunmuş “Yol xəritəsi”nin həyata keçirilməsini müzakirə ediblər, həmçinin iki ölkənin bazarlarına ixrac edilən malların nomenklaturasının genişləndirilməsi üzrə zəruri tədbirlər işləyib hazırlayıblar. Bundan başqa, tranzit, nəqliyyat, energetika, kənd təsərrüfatı, dəmiryol maşınqayırması və turizm sahələri iclasın yekunları üzrə gələcək qarşılıqlı faydalı əməkdaşlığın prioritet istiqamətləri kimi müəyyən edilib”.
İki il ərzində görülən işlərdən danışan diplomat onu da qeyd edib ki, Qazaxıstanın birinci Prezidenti Nursultan Nazarbayevin Bakıya səfəri çərçivəsində “NK “Kazakstan temir jolı” SC ilə “Azərbaycan Dəmir Yolları” QSC arasında Qazaxıstan istehsalı olan 40 yük elektrovozlarının tədarükünü də ehtiva edən saziş imzalanıb. Bugünədək artıq 4 elektrovoz Azərbaycana təhvil verilib, qalanları qrafikə uyğun olaraq, mərhələli şəkildə göndəriləcək.
Tərəflər biznes cəmiyyətləri arasında birbaşa əlaqələrin qurulmasına da böyük diqqət yetiriblər ki, bu da ikitərəfli ticarət əlaqələrinin möhkəmlənməsində daha bir hərəkətverici mexanizmdir. Bu məqsədlərlə səfirliyin dəstəyi ilə 2018-ci ilin mayında Bakıda Qazaxıstan-Azərbaycan biznes forumu təşkil olunub. Tədbirdə Qazaxıstandan Xarici Ticarət Palatası və “KazakhExport” sığorta şirkətinin geniştərkibli nümayəndə heyəti iştirak edib. Biznes forumda maşınqayırma, inşaat, elektroenergetika, dəmiryol, mebel və qida məhsullarının istehsalı sahələrində fəaliyyət göstərən 50-dən çox qazaxıstanlı və azərbaycanlı sahibkar iştirak edib.
B.İsabayev deyib: “Biznes forumun yekunları üzrə “KazakhExport” və Azərbaycanda İxracın və İnvestisiyaların Təşviqi Fondu (AZPROMO) arasında əməkdaşlığa dair Saziş imzalanıb, həmçinin iki ölkənin sahibkarlarının B2B görüşləri keçirilib. Forum işgüzar əlaqələrin qurulması, mal və xidmətlərin ikitərəfli ticarətinin genişləndirilməsi və ticarətin uzunmüddətli inkişafı və şaxələndirilməsi üçün münbit şəraitin yaradılması baxımından əlverişli platforma olub”.
“KazakhExport” Qazaxıstan məhsullarının Azərbaycan bazarına tədarükünü genişləndirmək üçün bu il Bakıda öz nümayəndəliyini açmağı planlaşdırır. Öz növbəsində, Qazaxıstanın şəhərlərində Azərbaycan ticarət evlərinin açılması da gözlənilir. Səfir qeyd edib: “Hesab edirəm ki, bu layihələrin həyata keçirilməsi, ilk növbədə, iki ölkənin sahibkarlarının öz məhsullarını tədarük etməsi və satış bazarlarını genişləndirməsi üçün əlavə imkanlar yaradacaq. 2018-ci ilin payızında qida məhsulları və inşaat materialları istehsal edən 29 Azərbaycan şirkəti ixrac missiyası ilə Almatı və Şımkent şəhərlərində olublar. Missiya çərçivəsində Azərbaycan şirkətlərinin təmsilçiləri Qazaxıstan biznesmenləri ilə görüşlər keçirib, ixracın təşkili və əməkdaşlıq məsələlərini müzakirə ediblər”.
Səfir, həmçinin energetika sahəsində əməkdaşlıqdan və enerji ehtiyatlarının xarici bazarlara tədarükündən bəhs edib. Bu məqsədlərlə idarələrarası işçi qrupları yaradılıb. B.İsabayev sonda deyib: ”Ötən ilin sentyabrında onların ilk iclasları keçirildi. İki ölkənin energetika nazirlərinin müavinləri Qazaxıstan neftinin və neft məhsullarının Azərbaycan üzərindən nəqli və Qazaxıstanın neft məhsullarının Azərbaycana tədarükü, həmçinin Qazaxıstanın sıxılmış təbii qazının Azərbaycana tədarükü və Xəzər dənizi üzərindən tranzitinin həyata keçirilməsi məsələlərini müzakirə ediblər. Biz yüksək səviyyədə əldə olunmuş razılaşmaların həyata keçirilməsi üçün maksimum dərəcədə səylər göstəririk və ikitərəfli ticarət-iqtisadi münasibətlərin perspektivlərinə nikbinliklə baxırıq”.
Bölmənin digər xəbərləri
