Qəbələ Dövlət Peşə Təhsil Mərkəzinin məzunu “İKA Dünya Kulinariya Olimpiadası”nda ölkəmizi təmsil edir
Bakı, 15 fevral, AZƏRTAC
Peşə təhsili məzunların gələcək karyera yollarına işıq salır.
AZƏRTAC “Müasir Azərbaycan peşəkarı” rubrikasında Qəbələ Dövlət Peşə Təhsil Mərkəzinin uğurlu məzunlarından Nicat Babayevin hekayəsini təqdim edir.
Nicat Babayev 1992-ci il mayın 28-də Oğuz rayonunda anadan olub. Hazırda Bakıda yaşayır. Aşpazlığa olan böyük sevgisi onu aşpaz ixtisası üzrə Qəbələ Dövlət Peşə Təhsil Mərkəzinə gətirib. İstehsalat təcrübəsini Qəbələ rayonunda yerləşən 5 ulduzlu hotellərdən birində keçib. Təhsilini bitirdikdən sonra elə həmin hoteldə əmək fəaliyyətinə başlayıb. Olduqca yüksək bacarıqlara malik gənc aşpaz məşhur hotellərdə uzun müddət çalışıb.
Nicat Babayev hazırda Azərbaycan Kulinariya Mütəxəssisləri Assosiasiyası üzvüdür.
“On ildən çoxdur ki, kulinariya sahəsində çalışıram. Bir çox yerli və beynəlxalq hoteldə baş aşpaz olaraq işləmişəm. Usta dərəcəli aşpaz , 2019-cu ildə “İlin qızıl aşpazı” adına və “Chefs Cup” mükafatına layiq görülmüşəm”, - deyə müsahibimiz qeyd edib.
Nicat Babayev hazırda Almaniyanın Ştutqart şəhərində keçirilən 26-cı “İKA Dünya Kulinariya Olimpiadası”nda Azərbaycanı təmsil edən komandanın üzvüdür.
“İKA Kulinariya Olimpiadası” hər 4 ildən bir keçirilir. Daha əvvəl 25-ci “İKA Dünya Kulinariya Olimpiadası”nda da iştirak etmişdim. Bu olimpiada 55 ölkədən 1200-dən çox iştirakçı və 7000-dən çox menyu üzərində təşkil olunub. Komandamız Dövlət Turizm Agentliyinin təşkilatçılığı ilə müvafiq tədbir üçün xüsusi yaradılmış kulinariya komandası “fərdi iştirakçı” kateqoriyasının qənnadı incəsənəti üzrə iki bürünc medal və 6 diplom, eləcə də “ictimai keytrinq” kateqoriyası üzrə komanda yarışında diplom əldə edib.
Dünya üzrə mötəbər kulinariya müsabiqələrindən sayılan olimpiadada ölkəmizi Milli Kulinariya Mərkəzinin dəstəyi və Ümumdünya Aşpazlar Cəmiyyətləri Assosiasiyasının təqdimatı ilə 9 aşpazdan ibarət heyətimiz “ictimai keytrinq” və “fərdi iştirakçı” kateqoriyalarında təmsil edib.
Müsabiqənin standartlarına əsasən milli komandanın təqdim etdiyi menyu ölkəmizin təbii biomüxtəlifliyini əks etdirməklə, eləcə də milli mətbəx mədəniyyətinin əsasları nəzərə alınmaqla tərtib edilib”, - deyə Nicat Babayev fikrini yekunlaşdırıb.
Bölmənin digər xəbərləri
