Qəbələdə iki məktəbin üç sinfinin bütün məzunları ali məktəblərə qəbul olunublar VİDEO
Qəbələ, 28 avqust, AZƏRTAC
Qəbələ rayonunda iki məktəbdən üç müxtəlif sinfin məzunlarının hamısı ali məktəblərə qəbul olunub.
AZƏRTAC-ın bölgə müxbiri xəbər verir ki, bu il ali məktəblərə daxil olmaq üçün imtahan vermiş 830 nəfər qəbələli məzundan 560 nəfəri ilkin mərhələdə tələbə adını qazanıb. Qəbul imtahanlarında məzunlardan 120 nəfəri 500-700 bal arası, o cümlədən 56 nəfər 600 baldan yuxarı nəticə göstərib. Ən yüksək nəticəni isə Qəbələ şəhər Nicat Apayev adına 4 nömrəli və Pərviz Osmanov adına 2 nömrəli məktəbin şagirdləri göstərib. Belə ki, hər iki təhsil ocağı Qəbələnin təhsil həyatında bir ilkə imza atıb. Hər iki təhsil ocağında siniflərdən birinin bütün məzunları ali məktəblərə ilkin mərhələdə qəbul olunublar.
Əməkdaşımız bu uğurlu nəticələri qazanan məktəblərin məzunları və müəllim kollektivi ilə görüşüb, onların gələcək planları ilə maraqlanıb. Bu il ali məktəblərə sənəd verən qəbələli məzunlar onlara göstərilən etimadı yetərincə doğrulda biliblər. Xüsusən şəhər 4 nömrəli məktəbin 11 A sinfini bitirən 19 məzunun hər biri yüksək balla ali məktəblərə qəbul olunub. Bu münasibətlə məzunlar on bir il təhsil aldıqları tam orta məktəbdə bir araya gələrək müəllimlərini ziyarət edib, gələcək planlarından bəhs ediblər.
Budur, müəllimlər və məktəbin direktoru sinif otağına daxil olur. Hər kəs birinci sinifdə olduğu kimi ayağa qalxıb müəllimi salamlayır. Məktəbin direktoru Məhəbbət Əliyeva məzunların uğur hekayələrini elə dəqiqliklə ifadə edir ki, onların özləri belə heyranlıqla dinləyir.
Məzunlar qazandıqları uğurlardan qürurla bəhs edirlər. Çünki bütün çətinliklər arxada qalıb. Məsələn, Aysu Balıyeva qəbul imtahanlarında 677 bal toplayaraq Azərbaycan Tibbi Universitetinə qəbul olunub.
Sinif yoldaşı Nuray Eldarlı isə 651 balla sinifdə ikincidir və o da gələcəkdə həkim olmaq arzusunu reallaşdırmaq əzmindədir. “Uğura çatmaq üçün bu uzun və zəhmətli yolda valideynlərimin və müəllimlərimin rolu əvəzsizdir”, - deyən Nuray sinif yoldaşlarına da bundan sonrakı təhsil həyatında uğurlar arzulayır.
Məktəbin direktoru Məhəbbət Əliyevanın sözlərinə görə, rəhbərlik etdiyi təhsil ocağı Qəbələnin təhsil həyatında bir ilkə imza atıb. Belə ki, bu il A və B sinifləri yüksək nəticə göstərib. 11A sinfinin 19 məzunun hamısı, digər sinfin 19 məzundan 18-i artıq ilk mərhələdə tələbə adını qazanıb. Yeri gəlmişkən, Məhəbbət müəllimənin iki əkiz övladı şəhərin digər məktəbindən tələbə adı qazananlar sırasındadır.
“Məzunlarımızdan beş nəfəri 600 baldan yuxarı nəticə göstərərək 4 nəfər Tibb Universitetini, bir nəfər isə Bakı Dövlət Universitetinin Hüquq fakültəsini qazanıb. Bizim 11-cilər arasında 8 nəfər fərqlənmə attestatı alıb. 11 B sinfinin 19 şagirdindən 18-i ali təhsil müəssisələrinə qəbul olunub. Ümid edirik ki, o bir nəfər də ikinci mərhələnin seçim turundan sonra tələbə adını qazanacaq”,- deyə direktor fikrini tamamlayır.
Məzunlarının yüksək nəticələri ilə uğura imza atan digər təhsil ocağı Qəbələ şəhər Pərviz Osmanov adına 2 nömrəli məktəbin kollektividir. Bu təhsil ocağının əksər müəllimləri bu gün ali məktəbə daxil olan sinfin məzunları ilə görüşə gəlmişdi.
Məktəbin həyətindəki qoşa çinarın ətrafına yığışan kollektiv 100 fazlik nəticə göstərən şagirdləri ilə qürur duyduqlarını, bu yüksək nəticənin gələcək siniflər üçün bir stimul yaratdığını bildirdilər.
Məktəbin məzunu Tükəzban Zalova hərbi həkimliyə daxil olan ilk qəbələli kimi qürurludur. Qaynar gənclik dövrü yaşayan Tükəzban seçdiyi sahəyə dərindən bağlıdır və hərbi həkim kimi gələcəkdə Azərbaycan Ordusunun əsgər və zabitlərinin keşiyində dayanacağına söz verir.
Məktəbin digər məzunu Aygün Qəriblinin hüquqşünaslıq ixtisasını seçməsinə səbəb onun ideal saydığı böyük bacısıdır. Belə ki, Aygünün bacısı hazırda Bakı Dövlət Universitetinin Hüquq fakültəsində təhsil alır. Qarşıdakı illərdə hər iki bacı bu sahə üzrə xaricdə magistr təhsili almaq və qanun keşiyində dayanmaq əzmindədirlər.
Tarixi ənənələri, milli vətənpərvərlik ruhunda yetişdirdiyi məzunları ilə hər zaman seçilən 2 nömrəli məktəbin direktoru Elsevər Mustafayev bildirir ki, bu 100 fazlik nəticədə, uğurda hər kəsin zəhməti var və builki məzunların uğuru digər şagirdlərə örnək göstəriləcək, siniflərarası rəqabəti gücləndiriləcək. Direktordan öyrənirik ki, 2 nömrəli məktəbin 11 A sinfinin 21 məzununun hamısı tələbə adını qazanıb. Bu da məktəbin tarixində bir ilkdir.
Məzunları məktəbə yığmaqda məqsədlərindən danışan direktor bildirir ki, onlara bu təhsil ocağı ilə daim əlaqə saxlamağı, tələbə həyatında yüksək nəticələri, vətəndaş mövqeləri ilə seçilməyi tövsiyə ediblər.
Sonda rayonun builki təhsil uğurları barədə ətraflı məlumat almaq məqsədilə Qəbələ rayon üzrə təhsil sektoruna müraciət etdik. Bildirildi ki, növbəti, yəni ikinci seçim turunda da tələbə adını qazananların sayının artacağına şübhə etmirlər. Digər tərəfdən rayon ümumtəhsil məktəbləri üzrə 1210 şagird 11 sinfi bitirib. Məzunlardan 101 şagird tam orta təhsil haqqında fərqlənmə attestatı, 2 şagird xüsusi nümunəli attestat alıb. Onlardan 1 nəfər qızıl,1 nəfər isə gümüş nişana layiq görülüb.
Bölmənin digər xəbərləri
