“Qərbin ikili standartları: demokratiya və insan hüquqları” mövzusunda “dəyirmi masa” keçirilib
Bakı, 30 aprel, Xalid Məmmədov, AZƏRTAC
Aprelin 30-da “Bakı-2015”: Birinci Avropa Oyunlarına Dəstək” Vətəndaş Cəmiyyəti Koalisiyası “Qərbin ikili standartları: demokratiya və insan hüquqları” mövzusunda “dəyirmi masa” təşkil edib.
“Dəyirmi masa”nı açan “Beynəlxalq Münasibətlərin Araşdırılması Mərkəzi” İctimai Birliyinin sədri, koalisiyanın əlaqələndiricisi Rufiz Qonaqov bildirib ki, Azərbaycan üçün əlamətdar olan bu oyunların keçirilməsinə hazırlıq tədbirləri yüksək səviyyədə həyata keçirilir. Birinci Avropa Oyunları Təşkilat Komitəsinin gərgin əməyi sayəsində nəzərdə tutulmuş bütün işlər yüksək səviyyədə yerinə yetirilir. Təəssüf ki, ölkəmizin qazandığı uğurları gözü götürməyən, onun nüfuzunun artmasından narahat olan bəzi daxili və xarici qüvvələr Azərbaycana qarşı məqsədyönlü və qərəzli kampaniya təşkil etməklə Avropa Oyunlarının əhəmiyyətini azaltmağa çalışırlar. Əminik ki, ölkəmizə qarşı aparılan bu çirkin kampaniya əvvəllər də olduğu kimi, bu dəfə də heç bir nəticə verməyəcək.
Milli Məclisin deputatı Zahid Oruc “Müstəqil dövlətlərdə keçirilən beynəlxalq idman və mədəniyyət tədbirlərini siyasiləşdirmək cəhdləri: Azərbaycan nümunəsi” mövzusunda məruzə ilə çıxış edib. O deyib ki, Qərbin, xüsusilə ABŞ-ın hazırki siyasəti onun özünün bərqərar etmək istədiyi demokratikləşməyə, demokratik dəyərlərə zərbə vurur. Faktiki olaraq ABŞ-ın demokratiya sahəsində yürütdüyü siyasət dünya dövlətlərinin xalqlarını qorxutmaqdadır. Demokratiya qeyri-sabitliyin, müharibələrin və toqquşmaların sinoniminə çevrilib. Bu siyasət Qərbin və ABŞ-ın maraqlarına daha çox zərbə vuracaq. Bu siyasət həm də Birləşmiş Ştatların Cənubi Qafqaza öz girişini bağlaması deməkdir.
Sonra “Bakı xəbər” qəzetinin baş redaktoru, koalisiyanın əlaqələndiricisi Aydın Quliyevin “Qərb ölkələrində insan hüquq və azadlıqları: beynəlxalq öhdəliklər və real vəziyyət” mövzusunda məruzəsi dinlənilib. O bildirib ki, bəzi Qərb ölkələri özlərini demokratik inkişaf yolunda model hesab edirlər. Amma təcrübə göstərir ki, özünü klassik demokrat kimi göstərməyə çalışanlar öz ölkələrinə baxmırlar, öz daxillərində cərəyan edən hadisələrə münasibət bildirmədən digər ölkələri ittiham edirlər ki, bu da ikili standartlara yol açır. A. Quliyev ABŞ-da və digər Qərb ölkələrində insan hüquqları sahəsində mövcud problemlər, polis zorakılığı, jurnalistlərin müstəqil fəaliyyətinə qoyulan qadağalar və s. barədə konkret faktları diqqətə çatdırıb. Qeyd edib ki, bu faktlar həmin ölkələrdə insan haqlarının real vəziyyətinin necə olması barədə aydın təsəvvür yaradır.
Daha sonra “İctimai Problemlərin Tədqiqi Assosiasiyası” İctimai Birliyinin sədri Məhərrəm Zülfüqarlı “ABŞ və Avropada irqi və dini ayrı-seçkilik hallarının artması: multikulturalizmin iflası” mövzusunda məruzə ilə çıxış edib. O, ABŞ-da və Avropa İttifaqına daxil olan ölkələrdə irqi və dini ayrı-seçkilik halları ilə bağlı faktları iştirakçıların nəzərinə çatdırıb. Vurğulanıb ki, dünyaya demokratiya dərsi keçməyə çalışan ABŞ insan haqları ilə bağlı 13 konvensiyadan 9-na qoşulmayıb. Avropa İttifaqına gəldikdə isə insan haqları ilə bağlı vəziyyətə nəzarət edən heç bir qurum yoxdur. Başqa ölkələrdə insan haqları barədə vəziyyətə tez münasibət bildirirlər, amma özlərində insan haqları ilə bağlı heç bir qurum yoxdur. Bu da orada vəziyyətin qeyri-normal olduğunu göstərir.
“Konstitusiya” Araşdırmalar Fondunun prezidenti Əliməmməd Nuriyev “Dövlət orqanlarının və beynəlxalq təşkilatların fəaliyyətində korrupsiya: faktlar və rəqəmlər” mövzusunda məruzəsində bildirib ki, bu gün Azərbaycanı korrupsiyada ittiham edənlərin özlərində kifayət qədər korrupsiya faktları mövcuddur. Beynəlxalq təşkilatlarda da korrupsiya faktları yetərincədir.
“APA Holdinq”in rəhbəri, Mətbuat Şurası İdarə Heyətinin üzvü Vüsalə Mahirqızı, Milli Məclisin deputatları Asim Mollazadə, Fazil Mustafa, Musa Qasımlı, Fərəc Quliyev, Çingiz Qənizadə, Azərbaycan Respublikasının Prezidenti yanında Dövlət İdarəçilik Akademiyasının Siyasi Araşdırmalar İnstitutunun direktoru Elman Nəsirov, “İnsan Hüquqları və Maarifçilik” İctimai Birliyinin sədri Rəfail Becanov, “Yeni Azərbaycan” qəzetinin baş redaktoru Hikmət Babaoğlu, “Səs” media qrupunun rəhbəri Bəhruz Quliyev, Mətbuat Şurasının İdarə Heyətinin üzvü, “İki sahil” qəzetinin baş redaktoru Vüqar Rəhimzadə və başqaları mövzu ilə bağlı çıxış edib, təkliflər səsləndiriblər. Onlar ilk Avropa Oyunlarının Azərbaycanın, eləcə də Avropanın idman tarixində əlamətdar hadisəyə çevriləcəyini əminliklə bildiriblər. Avropa Oyunları ərəfəsində Azərbaycana qarşı aparılan qarayaxma kampaniyasını pisləyib, ABŞ-ı və Avropanı ədalətli mövqe nümayiş etdirməyə çağırıblar.
Bölmənin digər xəbərləri
