Bakı, 2 sentyabr, AZƏRTAC

Azərbaycanlı idmançı, Qırmızı qəsəbə sakini Şahnur Mehdiyev titullar qazanmağa və pərəstişkarlarını sevindirməyə davam edir.

AZƏRTAC bu barədə “STMEGI”nin saytına istinadla xəbər verir. 2023-cü il dekabrın 28-də Gürcüstanda keçirilən Qrapplinq üzrə Cənubi Qafqaz çempionatında Mehdiyev 77 kiloqram çəki dərəcəsində möhtəşəm çıxış edib. O, bütün rəqiblərini keçərək, finala yüksəlib və burada gürcü idmançı İrakli Boboxidze ilə qarşılaşıb. Gərgin keçən mübarizədə Şahnur qalib gələrək qızıl medal qazanıb.

2024-cü il martın 9-da Mehdiyev Azərbaycanda keçirilən Qrapplinq üzrə Respublika Çempionatında iştirak edib. O, yenə 77 kiloqrama qədər çəki dərəcəsində mübarizə apararaq finala yüksəlsə də, həlledici görüşdə zədələnib. Bu da ona birinci yeri tutmağa mane olub. Buna baxmayaraq, idmançı turniri ikinci yerdə başa vuraraq Avropa çempionatına vəsiqə qazanıb.

Hazırda Şahnur Mehdiyev oktyabrda Qazaxıstanın paytaxtı Astanada keçiriləcək Qrapplinq üzrə dünya çempionatında Azərbaycanı təmsil etməyə hazırlaşır. Qarşıdakı yarışda o, 77 kiloqram çəki dərəcəsində çempion adı uğrunda mübarizə aparacaq.