Qubalı donorlar könüllü qan verərək nəcib təşəbbüsə dəstək olublar VİDEO
Quba, 24 aprel, Elxan Yusifli, AZƏRTAC
Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü ilə koronavirus (COVID-19) pandemiyası ilə əlaqədar ölkədə xüsusi karantin rejiminin tətbiq olunduğu müddətdə talassemiya və hemofiliya xəstəliklərindən əziyyət çəkən uşaqlar üçün keçirilən qanvermə aksiyasına Quba sakinləri də qoşulublar.
AZƏRTAC-ın bölgə müxbiri xəbər verir ki, qanvermə aksiyası aprelin 24-də Səhiyyə Nazirliyinin B.Eyvazov adına Hematologiya, Transfuziologiya İnstitutu nəzdində Mərkəzi Qan Bankının Quba rayon bölməsində Rayon İcra Hakimiyyətinin dəstəyi ilə keçirilib.
Qanvermə aksiyasında Quba Rayon İcra Hakimiyyətinin rəhbərliyi, bələdiyyələr və icra nümayəndəliklərinin əməkdaşları, rayonun idarə və müəssisələrinin kollektivləri, eyni zamanda, rayon polis şöbəsinin şəxsi heyəti fəal iştirak ediblər.
Xüsusi tibb briqadasının həkim-hematoloqları rayon mərkəzi xəstəxanasının tibb heyəti ilə birgə donorları müayinə etdikdən sonra onlardan qan götürüblər.
Humanitar aksiya çərçivəsində əldə edilən qan nümunələri Respublika Mərkəzi Qan Bankına göndəriləcək və irsi qan xəstəliklərindən əziyyət çəkənlərin müalicəsində istifadə olunacaq.
Bölmənin digər xəbərləri
