Rabatda Azərbaycanın Zəfər Günü və Bayraq Günü qeyd edilib
Rabat, 10 noyabr, AZƏRTAC
Azərbaycan Respublikasının Mərakeş Krallığındakı səfirliyində 8 Noyabr - Zəfər Günü və 9 Noyabr - Bayraq Günü münasibətilə təntənəli tədbir keçirilib.
AZƏRTAC xəbər verir ki, əvvəlcə şəhidlərimizin əziz xatirəsi bir dəqiqəlik sükutla yad edilib.
Səfirliyin müvəqqəti işlər vəkili B.Əhmədov hər iki Qarabağ müharibəsi haqqında qısa məlumat verib. O, Ermənistanın Azərbaycana təcavüzü nəticəsində iyirmi faiz ərazimizin işğal altında qaldığını, bu müddət ərzində Azərbaycanın hər zaman münaqişənin sülh yolu ilə həll olunmasına çalışdığını, lakin Ermənistanın işğal etdiyi torpaqları dinc yolla qaytarmaqdan imtina etdiyini və Azərbaycana müharibədən başqa yol qalmadığını bildirib. Otuz ilə yaxın işğalda qalan torpaqlarımızın Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə cəmi 44 günə azad edildiyi vurğulanıb.
B.Əhmədov bu Qələbənin əsasında məhz ümummilli lider Heydər Əliyevin uzaqgörən milli dövlətçilik strategiyasının durduğunu qeyd edib. Belə ki, Ulu öndərin 1993-cü ildə hakimiyyətə gəldikdən sonra ordu quruculuğunun dövlətin əsas prioritet istiqaməti olduğunu, daha sonra bu siyasətin Prezident İlham Əliyev tərəfindən uğurla davam etdirildiyini və güclü təməllər üzərində qurulmuş milli ordumuzun müasir təchizatlı və çevik döyüş qabiliyyətli orduya çevrildiyini qeyd edib, məhz bu uzaqgörən dövlətçilik strategiyasının nəticəsində ölkəmizin suverenliyinin və ərazi bütövlüyünün bərpa olunduğunu bildirib. Azad edilmiş ərazilərimizdə gedən bərpa və quruculuq işləri, Füzuli və Zəngilanda istifadəyə verilmiş beynəlxalq hava limanları kimi böyük layihələrə dair məlumatları tədbir iştirakçılarının diqqətinə çatdırıb.
Diplomat Mərakeş Krallığının hər zaman Azərbaycanın haqlı mövqeyini dəstəklədiyi üçün bu ölkəyə təşəkkürünü bildirib.
Türkiyə Respublikasının Rabatdakı səfirliyinin adından çıxış edən hərbi müşavir polkovnik Erkan Gökbulaq hər iki bayram münasibətilə Azərbaycan xalqını təbrik edərək, Azərbaycanla Türkiyənin bir millət, iki dövlət olduğunu, hər iki ölkənin bu prinsipə daim sadiq qaldığını, bundan sonra da xalq və dövlət olaraq hər zaman Azərbaycanın yanında olacaqlarını vurğulayıb.
Tədbirin keçirilməsində səfirliyə yaxından kömək göstərən Yunus Əmrə İnstitutunun müdiri Ensar Fırat çıxışında Azərbaycanın Zəfəri ilə qürur duyduqlarını, mədəni tədbirlərin keçirilməsində hər zaman səfirliyə dəstək göstərməyə hazır olduqlarını bildirib.
Mərakeşdə yaşayan Azərbaycan və Türkiyə icmaları adından çıxış edən V Məhəmməd Universitetinin doktorantı Fatih Dağ Zəfər bayramı münasibətilə təbriklərini çatdıraraq, Bəxtiyar Vahabzadənin Azərbaycan-Türkiyə şerini söyləyib.
Tədbirdə Türkiyə və Qazaxıstan səfirlikləri tam heyətlə iştirak edib. Həmçinin iştirakçılar arasında paytaxt Rabatın merinin birinci müavini xanım Fətiha Əl-Mudni, Mərakeş Parlamentinin deputatları, Pakistan, Malayziya, İndoneziya səfirləri, əcnəbi diplomatlar, yerli ziyalılar, o cümlədən azsaylı Azərbaycan icmasının üzvləri və Türkiyə vətəndaşları iştirak edib.
Bundan əlavə tədbir iştirakçıları arasında Mərakeşdə səfərdə olan Pakistanın Bəlucistan vilayətinin kommunikasiya və tikinti naziri Sərdar Əbdurrəhman Xetran və onun köməkçisi Kaşif Xan da olub.
Tədbirdə Zəfər bayramına həsr olunan videoçarx, fotostendlər, Qarabağ, Quba, Gəncə, Qazax və Təbriz xalçaları nümayiş etdirilib, Mərakeşin tanınmış müğənnisi Samira Azərbaycan, türk və ərəb mahnılarını canlı ifa edib.
Bayram tədbiri yerli KİV-də geniş işıqlandırılıb.
Nigar Cəfərli
AZƏRTAC-ın xüsusi müxbiri
Rabat
Bölmənin digər xəbərləri
