Bakı, 12 dekabr, AZƏRTAC

Dekabrın 12-də Əqli Mülkiyyət Agentliyinin tabeliyində olan Respublika Elmi-Texniki Kitabxanasında müasir müstəqil Azərbaycan dövlətinin memarı və qurucusu, Ümummilli Lider Heydər Əliyevin anım günü ilə əlaqədar tədbir keçirilib.

Agentlikdən AZƏRTAC-a bildirilib ki, tədbirdə Respublika Elmi-Texniki Kitabxanasının direktoru Mübariz Məmmədli dünyaşöhrətli ictimai-siyasi xadim Heydər Əliyevin həyat və fəaliyyəti haqqında çıxış edib.

“Ulu Öndər Heydər Əliyevin əbədiyyətə qovuşmasından 21 il ötür. Bu illər ərzində ölkəmizdə və dünyada çox ciddi dəyişikliklər baş verib. Dəyişməyən Azərbaycan xalqının Heydər Əliyev şəxsiyyətinə, onun siyasətinə olan sədaqəti və böyük sevgisidir. Ulu Öndər Heydər Əliyevin Azərbaycanda ilk dəfə siyasi hakimiyyətə gəlməsi xalqımızın tarixində yeni eranın başlanğıcı oldu və Azərbaycan SSRİ-nin iqtisadi flaqmanına çevrildi, mədəniyyət, incəsənət, ədəbiyyat sahələri intibah dövrünə qədəm qoydu. Heydər Əliyevin qurduğu sənaye, inkişaf etdirdiyi iqtisadiyyat, yaratdığı hərbi təyinatlı təhsil müəssisələri, formalaşdırdığı və qoruduğu milli elita müstəqilliyimizin bərpası, ölkəmizin suverenliyi üçün prioritetə çevrildi”, - deyə Mübariz Məmmədli bildirib.

Qeyd olunub ki, Ulu Öndər Heydər Əliyevin ən böyük arzusu Azərbaycan torpaqlarının işğaldan azad edilməsi və Azərbaycan Bayrağının azad edilmiş Şuşada, bütün Qarabağda dalğalanması idi. Prezident, Ali Baş Komandan İlham Əliyevin rəhbərliyi ilə Azərbaycan Ordusu torpaqlarımızı işğaldan azad etdi. Bu gün üçrəngli Bayrağımız Azərbaycanın bütün ərazilərində dalğalanır.

Daha sonra “Liderin ürəyi” filmi nümayiş etdirilib.