RİQADA AZƏRBAYCAN-LATVİYA BİZNESFORUMU KEÇİRİLƏCƏKDİR

29.09.2006 [19:25]
Çap et
A⁺ A^-

Azərbaycanda İxracın və İnvestisiyaların Təşviqi Fondundan AZƏRTAC-a bildirmişlər ki, oktyabrın 5-də Riqada Azərbaycan-Latviya biznes forumu keçiriləcəkdir. Biznes forumda hər iki tərəfdən yeyinti məhsullarının emalı, inşaat materialları, kimya sənayesi və digər sahələri təmsil edən 60-dan artıq iş adamının, rəsmi şəxslərin iştirakı gözlənilir. Forum çərçivəsində iki ölkənin iş adamlarının birbaşa danışıqları planlaşdırılır. Yeri gəlmişkən, ötən il oktyabrın 4-də Bakıda Latviya Prezidenti xanım Vayra Vike-Freyberqanın ölkəmizə rəsmi səfəri çərçivəsində 150-yə yaxın Azərbaycan və 50-dən yuxarı Latviya iş adamının iştirakı ilə biznes forum keçirilmiş və sahibkarlar arasında əməkdaşlığa dair sənədlər imzalanmışdı.

Xatırladaq ki, Azərbaycanla Latviya arasında 10-a yaxın müqavilə və saziş imzalanmışdır. İqtisadiyyatın müxtəlif sahələrini əhatə edən “İnvestisiyaların təşviqi və qorunması”, “İkiqat vergidən azad olma”, “İqtisadi, elmi-texniki və mədəni əməkdaşlıq” kimi sənədlər bu sıradandır. 2006–cı ilin yanvar-iyul aylarında ölkələrimiz arasında ümumi ticarət dövriyyəsi 6,6 milyon ABŞ dolları təşkil etmişdir. Bu, 2005-ci ilin müvafiq dövrü ilə müqayisədə 2 dəfə çoxdur. Azərbaycandan Latviyaya, əsasən, pambıq mahlıcı, dizel yanacağı, polimer maddələr və sair ixrac edilir. Latviyadan Azərbaycana isə, əsasən, dərman vasitələri, süd məhsulları, müxtəlif növ avadanlıq və s. gətirilir.

RİQADA AZƏRBAYCAN-LATVİYA BİZNESFORUMU KEÇİRİLƏCƏKDİR

MÜƏLLİFLƏ ƏLAQƏ

Bölmənin digər xəbərləri