ELM VƏ TƏHSİL
Riyaziyyatçı alimlərin məqaləsi beynəlxalq jurnalda dərc olunub
Bakı, 2 dekabr, AZƏRTAC
Riyaziyyat və Mexanika İnstitutunun direktoru, AMEA-nın müxbir üzvü Misir Mərdanovun və müəssisənin baş elmi işçisi, professor Ramiz Aslanovun həmmüəllif olduğu “Nəsirəddin Tusinin əsərlərindəki əxlaqi və mənəvi dəyərlər” adlı ingilis dilində məqalə “Clarivate Analytics” bazasına daxil olan “ARPHA Proceedings” jurnalında işıq üzü görüb.
İnstitutdan AZƏRTAC-a bildirilib ki, məqalədə dahi Azərbaycan astronomu, riyaziyyatçı, filosof Nəsirəddin Tusinin “Əxlaqi-Nasiri” və “Müəllimlərin və təhsil alanların əxlaq qaydaları” adlı əsərlərində bir sıra əxlaqi və mənəvi baxışları tədqiq olunur. Əsərdə N.Tusinin müasir pedaqoji fikir tarixində, xüsusilə də şəxsiyyətin inkişafı və ona təsir edən tərbiyə nəzəriyyələri sahəsində rolu müəyyən olunub. Onun fəlsəfi əsaslar və mənəvi təmizlik, uşaqların tərbiyəsi və ailə başçısı kimi, ölkənin sülhməramlı və siyasi idarəçiliyi haqqında fikirləri məşhurdur.
Dərin elmi tədqiqatlara əsaslanan fikirlər prosesində müəlliflər oxucunu belə bir nəticəyə yönəldir ki, Nəsirəddin Tusi hər bir elm sahəsinin baza əsasını müəyyən edərək bu amillərin tərbiyə nəzəriyyəsində əksini tapmasına xüsusi diqqət yetirir. Müəlliflər gənc nəslin formalaşmasında əxlaqi və mənəvi dəyərlərin rolunu və mahiyyətini təhlil edərək müasir dövrdə onun vacibliyini xüsusi qeyd edirlər.