Roman Qriqorçuk: “Qarabağ”ı taxtdan salmaq “Neftçi” üçün çox çətin olacaq
Bakı, 22 dekabr, AZƏRTAC
“Neftçi”də olduğum dövr haqqında dəfələrlə danışmışam. Orada hər şey normal idi. Yalnız nəticə istədiyimiz kimi deyildi.
AZƏRTAC xəbər verir ki, bu sözləri ukraynalı mütəxəssis Roman Qriqorçuk “Neftçi”nin yeni baş məşqçisi təyin olunan həmyerlisi Yuri Vernidub haqqında danışarkən deyib.
Vaxtilə “Neftçi”də işləmiş çalışdırıcı komandada lazımi nəticəni heç cür əldə edə bilmədiklərini xatırladıb: “Neftçi” böyük brenddir, lakin bu klub uzun müddətdir yüksək nəticələr qazana bilmir. Komandanın turnir cədvəlinin zirvəsində olmamasına və ardıcıl qələbələr qazanmamasına səbirli yanaşmaq çətindir. Avrokuboklara vəsiqə qazanmamaq böyük klub üçün normal hal sayılmır. “Neftçi” adlı-sanlı, böyük klubdur. Nəticə olmayanda isə ümid edirlər ki, başqa bir məşqçi gələcək və dərhal ortaya uğurlu iş qoyacaq”.
60 yaşlı mütəxəssis “Neftçi” rəhbərliyi ilə yaxşı münasibətlərinin olduğunu söyləyib: “Rəhbərlik barədə bir dənə də olsun mənfi söz deyə bilmərəm. Onlarla münasibətlərim o qədər səmimidir ki, bunu təsəvvür belə edə bilməzsiniz. Klub rəhbərliyi ilə aramda çox isti münasibətlər qalıb. Yuri Verniduba isə yalnız uğurlar arzulamaq istəyirəm. Arzum budur ki, həm özünün, həm də klub rəhbərliyinin qarşısına qoyduğu məqsədlərə çatsın. “Qarabağ”ı taxtdan salmaq çox çətin olacaq, lakin düşünürəm ki, “Neftçi”nin əsas hədəfi çempionluqdur. Mən bu komandanın sükanı arxasına keçəndə hamını yalnız bir məqsəd – ən yüksək yer və Çempionlar Liqasında çıxış maraqlandırırdı. Arzu edirəm ki, Yuri Vernidub bu hədəflərə nail olsun”.
Roman Qriqorçuk vaxtilə Azərbaycanda “Qəbələ” və “Neftçi” komandalarını çalışdırıb.
Xatırladaq ki, “Neftçi” bir müddət əvvəl Yuri Vernidubla 1,5 illik müqavilə imzalayıb.
Bölmənin digər xəbərləri
