Rüfət Hacılı: Çalışacağıq ki, idmançılarımız Paralimpiadaya ən yaxşı şəkildə hazırlaşsınlar
Bakı, 8 avqust, AZƏRTAC
Paralimpiada kimi mötəbər turnirlərdə müəyyən problemlərlə üz-üzə gəlirik. Bəzən büdcə, bəzən isə qidalanma ilə bağlı məsələlərdə çətinliklər yaşayırıq.
AZƏRTAC xəbər verir ki, bu barədə Milli Paralimpiya Komitəsinin Beynəlxalq əməkdaşlıq və ictimaiyyətlə əlaqələr şöbəsinin rəhbəri Rüfət Hacılı “Paris-2024” Yay Paralimpiya Oyunları öncəsi keçirilən mətbuat konfransında deyib. O, Parisdə Azərbaycan idmançılarının bu kimi hallarla üzləşməməsi üçün əllərindən gələni edəcəklərini söyləyib: “Xüsusilə, onların qidasına diqqət yetirəcəyik. Çalışacağıq ki, “Paris-2024”ə ən yaxşı şəkildə hazırlaşsınlar”.
R.Hacılı Milli Paralimpiya Komitəsinin yeni saytının istifadəyə veriləcəyini də diqqətə çatdırıb: “Sayt Paris Paralimpiadası ərəfəsində istifadəyə veriləcək. Burada Azərbaycan təmsilçilərinin yarışlardakı nəticələri barədə məlumat əldə etmək mümkün olacaq”.
Qeyd edək ki, “Paris-2024” Yay Paralimpiya Oyunları avqustun 28-dən sentyabrın 8-dək keçiriləcək.
Bölmənin digər xəbərləri
