RUSİYA PREZİDENTİ SEÇKİLƏRİNƏ ATƏT-İN MÜŞAHİDƏÇİLƏR MİSSİYASI TƏYİN EDİLDİ

14.02.2004 [08:17]
Çap et
A⁺ A^-

AZƏRTAC ATƏT-in Vyanadakı katibliyinin mətbuat xidmətinə istinadla xəbər verir ki, Avropada Təhlükəsizlik və Əməkdaşlıq Təşkilatının Rusiyada martın 14-də keçiriləcək prezident seçkilərində monitorinq aparacaq müşahidəçilər missiyası təyin edilmişdir.

Böyük Britaniya nümayəndəsi Culian Pil Yetsin başçılıq edəcəyi missiyanın tərkibinə 16 beynəlxalq ekspert və 34 müşahidəçi daxildir. Fevralın 16-dan başlayaraq ekspertlər Mərkəzi Seçki Komissiyası yanında, müşahidəçilər isə Rusiya regionlarında işləyəcəklər.

Seçkilər günü ATƏT-in Demokratik Təsisatlar və İnsan Hüquqları Bürosundan, habelə Avropa Şurasının Parlament Assambleyasından onlara 400-dən çox müşahidəçi qoşulacaqdır.

Missiyanın tərkibində ATƏT-in üzvü olan 16 ölkədən müşahidəçilər vardır. Monitorinqin ilkin nəticələrini martın 15-də açıqlamaq nəzərdə tutulur.