“Şamaxı”nın futbolçusu Adil Nağıyev Azərbaycan Premyer Liqasının cari mövsümünün ilk avtoqolunun müəllifi olub
Bakı, 15 oktyabr, AZƏRTAC
“Şamaxı”nın futbolçusu Adil Nağıyev Azərbaycan Premyer Liqasının 2022/2023-cü il mövsümünün ilk avtoqolunun müəllifi olub. O, onuncu turun “Qəbələ” ilə ev oyununda (1:1) öz qapısına qol vurub.
AZƏRTAC xəbər verir ki, müdafiəçi bununla da Azərbaycan çempionatları tarixinin antirekordunu təkrarlayıb. Belə ki, A.Nağıyev Premyer Liqada 3-cü avtoqoluna imza atıb.
Onun əvvəlki iki uğursuzluğu “Zirə”də çıxış etdiyi 2018/2019-cu il mövsümünə təsadüf edib. A.Nağıyev 2018-ci il sentyabrın 30-da “Sumqayıt”, 21 gün sonra “Keşlə” (indiki “Şamaxı”) ilə qarşılaşmada “fərqlənib”.
Dörd ildən sonra yenə öz qapısına qol vuran futbolçu Azərbaycan çempionatları tarixində ən çox avtoqol edən oyunçular sırasında qoşulub. O, üç belə üzüntü yaşayan 8-ci futbolçudur.
A.Nağıyevədək Denis Silva, Jairo Rodriges, Ayxan Abbasov, Saşa Yunisoğlu, Natiq Qasımov, həmçinin karyerasını hələ də Premyer Liqada davam etdirən Bədavi Hüseynov və Ruslan Abışov da üç avtoqol müəllifidir.
Qeyd edək ki, daha 17 oyunçu birdən artıq - hərəyə iki avtoqola üzülüb.
Bölmənin digər xəbərləri
