Bakı, 18 fevral, AZƏRTAC

Münxen Təhlükəsizlik Konfransının 59-cu toplantısı çox həssas geosiyasi bir dönəmə təsadüf edir. Müasir xarici siyasət və beynəlxalq təhlükəsizliyin ən aktual məsələlərinin müzakirə edildiyi tədbirin builki mövzuları sırasında heç şübhəsiz ki, enerji təhlükəsizliyi kontekstinin çəkisi xeyli qabarıq görünəcək. Aydındır ki, Rusiya-Ukrayna münaqişəsi fonunda qütblərarası ziddiyyətin kəskinləşdiyi bir şəraitdə Avroməkan üçün enerji təhlükəsizliyindən daha ciddi təhdid yoxdur. Azərbaycan isə artıq son 30 ildə Avratlantik təhlükəsizlik arxitekturasının ayrılmaz bir halqası olduğunu, o cümlədən son bir neçə ildə qoca qitənin ən etibarlı və təhlükəsiz enerji təchizatçılarından birinə, Cənubi və Mərkəzi Avropa üçün isə enerji təhlükəsizliyinin əsas qarantına çevrilib. Üstəlik, yaxın dövr ərzində Azərbaycanın ənənəvi enerji resurslarının ixracının həcmini köklü şəkildə artırmaq planları, habelə hazırda aktual olan yaşıl enerji və bərpaolunan mənbələr hesabına artmaqda olan potensial fonunda Bakının mövqeyinin daha da güclənəcəyini proqnozlaşdırmaq çətin deyil. Bu mənada güvənilir tərəfdaş kimi Prezident İlham Əliyevin Münxen Konfransında arzulanan qonaq hesab edilməsi təbiidir.

Bu fikirləri Milli Məclisin deputatı Bəhruz Məhərrəmov AZƏRTAC-a açıqlamasında söyləyib.

O qeyd edib ki, Avropa üçün Azərbaycanın əhəmiyyəti yalnız enerji resursları prizmasından qiymətləndirilmir. Qərb və Şərq dünyalarının qovuşuğunda yerləşən Azərbaycan Respublikası bir çox sivilizasiyaların müsbət məqamlarını özündə cəmləşdirib. Azərbaycan Avropanın Şərqə qapısıdır, eyni zamanda, İslam dünyasının bir hissəsi kimi bu mədəniyyətin irs və təfəkkürünü layiqincə təmsil edir. Hazırda Avropada dərinləşən və Avroməkanın təhlükəsizlik mühiti üçün digər ciddi təhdidə çevrilən islamofobiya və neonasizmlə mübarizədə qlobal müstəvidə nüfuza malik bir lider kimi Azərbaycan Prezidenti qətiyyətli mövqe nümayiş etdirən, habelə barışdırıcı güc kimi çıxış edə bilən az sayda siyasi personalardan biridir. Avropanın özünün bir sıra liderləri artıq İlham Əliyev şəxsiyyətindən öyrənə biləcək çox şeyin olduğunu ictimai formada dilə gətirməkdən çəkinmirlər.

“Digər çox mühüm məqam, Azərbaycan öz gücü hesabına təhlükəsizlik mühiti formalaşdıra bilmiş, beynəlxalq hüququn aliliyini təmin etmiş dövlət kimi bölüşə biləcəyi təcrübəyə sahibdir. Bildiyiniz kimi, 2020-ci ilin sentyabr-noyabr aylarında davam edən 44 günlük savaş sonrası işğala son qoymaqla BMT qətnamələrini icra etmək, sülh və əməkdaşlıq üçün münbit şəraitin yaranması istiqamətində çox ciddi reallıq yaratmaqla Prezident İlham Əliyev bu gün ortaya Azərbaycan modeli qoyub. Üstəlik, müharibədən öncə Ermənistanın təcavüzkar mahiyyətinin ifşa olunması üçün Münxen Təhlükəsizlik Konfransı vacib platformalardan biri kimi çıxış edib. Müharibədən 6 ay əvvəl, 2020-ci ilin fevral ayında Azərbaycan və Ermənistan liderlərinin məhz Konfrans çərçivəsində baş tutan canlı debatında dövlətimizin başçısı İlham Əliyev Nikol Paşinyanı və Ermənistanın təcavüzkar mahiyyətini ifşa etməklə informasiya müharibəsində üstünlüyü istisnasız olaraq ələ aldı. Müharibə və postmüharibə periodlarında, xüsusən, şanlı Zəfərin nəticələrinin əldə saxlanılmasında Azərbaycan Prezidentinin məhz Münxen qələbəsinin nəticələri müstəsna əhəmiyyətə malik oldu”, - deyə Bəhruz Məhərrəmov vurğulayıb.

Deputatın sözlərinə görə, şübhəsiz ki, 59-cu Münxen Təhlükəsizlik Konfransında Ukrayna mövzusu əsas müzakirə predmetlərindən biri olacaq. Təəssüf ki, bu gün bəzi Avropa dairələri Ukrayna məsələsini də bu və ya digər formada şantaj predmetinə çevirməkdədir. Amma Azərbaycan Prezidenti bu prosesdə də suveren və müstəqil iradə sahibi kimi çıxış edərək müzakirələrə çoxlarından bir neçə addım öndə başlayacaq. Çünki konfransdan iki gün öncə, fevralın 15-də Ukrayna Prezidenti Volodimir Zelenski Prezident İlham Əliyevə zəng edərək ölkəsinin ərazi bütövlüyünə və suverenliyinə verdiyi dəstəyə və göstərilən humanitar yardımlara görə Azərbaycan Prezidentinə təşəkkürünü bildirib. Nəzərə alaq ki, rəsmi Kiyev açıq formada bəzi Qərb dövlətlərini hətta ittiham etməkdədir. Bu mənada, Prezident İlham Əliyevin beynəlxalq hüququ rəhbər tutmaq şərti ilə Moskva və Kiyevlə münasibətlərdə qızıl ortanı taparaq davranması, heç şübhəsiz ki, davamlı və qeyri-rəsmi dialoq yaratmaqla etimad qurmaq, qlobal və regional problemlərin, münaqişələrin həllinə töhfə vermək kimi məqsədləri hədəfləyən 59-cu Konfransın diqqət yetirməli mövzularından birinə çevrilməlidir.